Një 23-vjeçare iraniane dënuar me vdekje për shkak të një postimi në rrjetet sociale

Studentja iraniane Najmeh Amini është dënuar me vdekje për shkak të një postimi në rrjetet sociale që autoritetet e vlerësuan si fyerje ndaj profetit Muhamed. Kjo vajzë 23-vjeçare aktualisht ndodhet në burg në Mashhad; dënimi ende nuk është i formës së prerë dhe ajo mund të apelojë në Gjykatën e Lartë, raporton "The Guardian".

Në një rast të veçantë, ajo është dënuar me 12 vjet, gjashtë muaj dhe një ditë burg për akuza të veprimit kundër sigurisë kombëtare dhe përhapjes së propagandës kundër regjimit.

Amini u arrestua gjatë protestave në janar. Muajin e kaluar, ajo nga burgu bëri thirrje për ndihmë ndaj komunitetit ndërkombëtar. "Nuk dua të paraqitem si heroinë. Dua vetëm një gjë: bëhuni zëri im", tha ajo në një mesazh audio, duke iu drejtuar Kombeve të Bashkuara, avokatëve dhe organizatave për të drejtat e njeriut që të hetojnë rastin e saj.

Gjyqtari hodhi poshtë mbrojtjen e saj
Sipas gazetës iraniane "Khorasan", Amini i tha gjykatës se kishte shkruar postimin pasi kishte konsumuar kërpudha halucinogjene me shokët. Avokati i saj pretendoi se ishte një gabim i paqëllimshëm në fjalim, por gjyqtari e hodhi poshtë mbrojtjen. Sipas raportit të gazetës, ai pyeti pse, në atë gjendje, ajo nuk kishte fyer persona të tjerë apo kundërshtarë të regjimit, si SHBA dhe Izraeli.

Ligji iranian parashikon dënimin me vdekje për fyerje ndaj profetit Muhamed. Megjithatë, dënimet me vdekje për këto vepra janë të rralla. Ekzekutimet e fundit të njohura për blasfemi ndodhën në vitin 2023, kur u ekzekutuan dy burra pasi u dënuan për aktivitetet e tyre në rrjetet sociale. Organizatat për të drejtat e njeriut paralajmërojnë për rritjen e përdorimit të dënimit me vdekje në Iran. Organizata "Iran Human Rights" ka njoftuar se këtë vit janë ekzekutuar më shumë se 600 persona.