Përfaqësuesit iranianë u larguan nga bisedimet për përfundimin e luftës me SHBA-në

Përfaqësuesit iranianë të dielën u larguan nga bisedimet me ndërmjetësit katarezë për përfundimin e luftës me SHBA-në, por jo për shkak të mosmarrëveshjeve në bisedime, tha një përfaqësues i njohur me procesin. Ai shtoi se tashmë ekziston një draft-propozim për marrëveshje dhe se është e mundur një takim i ri.

Zëdhënësi i Ministrisë iraniane të Punëve të Jashtme, Esmail Bagei, deklaroi se baza për bisedimet është plani iranian me shtatë hapa, i cili parashikon rihapjen e ngushticës së Hormuzit dhe heqjen e bllokadës detare amerikane.

Bagei theksoi se nuk do të jetë e mundur një marrëveshje përfundimtare pa heqjen e bllokadës dhe përmbushjen e kërkesave iraniane.

Ministri iranian i Punëve të Jashtme, Abbas Arakçi, më parë kishte deklaruar se, nëse arrihet marrëveshje, ngushtica e Hormuzit mund të hapet brenda dy ditëve, në vend të shtatë ditëve të parashikuara fillimisht.

Presidenti amerikan Donald Trump deklaroi se bisedimet me Teheranin ishin produktive dhe se SHBA nuk do të kryejë sulme të reja ndaj Iranit para përfundimit të zgjedhjeve kongresuale, por nuk përjashtoi mundësinë e veprimeve të mëtejshme ushtarake.