Rezultatet e para zyrtare nga zgjedhjet në Serbi priten rreth orës 21:15

Vendvotimet në Serbi u mbyllën në orën 20:00, me disa përjashtime, njoftoi kryetari i Komisionit Republikan Zgjedhor (RIK), Vladimir Dimitrijeviq.

Votimi do të vazhdojë në vendvotimet ku ishte ndërprerë për më shumë se një orë, si dhe atje ku në momentin e mbylljes para vendvotimeve ende kishte qytetarë që prisnin për të votuar. Të gjithë ata do të kenë mundësi të ushtrojnë të drejtën e tyre të votës.

Dimitrijeviq njoftoi se procesverbali i parë i përpunuar nga një vendvotim pritet rreth orës 21:15, pas së cilës rezultatet preliminare zyrtare do të fillojnë të publikohen gradualisht në faqen e internetit të RIK-ut.

"Nuk do të pritet që të përpunohen të gjitha vendvotimet, por rezultatet do të jenë të disponueshme gradualisht, ndërsa të dhënat vijnë, futen në sistem dhe kalojnë përpunimin statistik dhe kontrollin logjik-matematik të parashikuar", shpjegoi ai.

Pas numërimit të votave dhe përcaktimit të rezultateve për secilën listë zgjedhore, komisionet zgjedhore dorëzojnë procesverbalet te komisionet lokale zgjedhore, ku ato skanohen dhe përpunohen.

Qytetarët do të mund të ndjekin rezultatet nga çdo vendvotim veç e veç në faqen e internetit të RIK-ut, sapo të dhënat të jenë futur dhe përpunuar. Rezultatet do të shfaqen njëkohësisht edhe në ekranet e mëdha në sallën qendrore të Kuvendit Popullor serb, ku ndodhet selia e komisionit.

Mediat dhe vëzhguesit do të kenë qasje në numrin dhe përqindjen e vendvotimeve të përpunuara, si dhe në rezultatet e listave zgjedhore bazuar në të dhënat e përpunuara deri atëherë.

Kryetari i RIK-ut theksoi se listat zgjedhore, falë përfaqësuesve të tyre në vendvotime, do të mund të marrin të dhëna jozyrtare për rezultatet edhe para publikimit zyrtar.

Ai theksoi se publikimi gradual i rezultateve është në përputhje edhe me rekomandimet e Zyrës së OSBE-së për Institucione Demokratike dhe të Drejtat e Njeriut (ODIHR) nga viti 2022, me qëllim sigurimin e transparencës sa më të madhe të procesit zgjedhor.

Sipas të dhënave të fundit zyrtare të RIK-ut, deri në orën 18:00 kanë votuar 64.89 për qind e zgjedhësve të regjistruar në Serbi, pa Kosovën.