Trump: New Mexico duhet menjëherë të ndryshojë emrin e vet në Amerika e Re
Presidenti amerikan Donald Trump dje i bëri thirrje shtetit federal New Mexico që të ndryshojë emrin e tij në "Amerika e Re" – një shembull i fundit i përpjekjeve të tij për të ndryshuar emra gjeografikë në përputhje me agjendën e tij politike.
"New Mexico duhet menjëherë të ndryshojë emrin e vet në Amerika e Re. Ne nuk jemi Meksikë; ne jemi Shtetet e Bashkuara të Amerikës!" – shkroi Trump në rrjetin social "Truth Social", menjëherë para se të largohej nga Shtëpia e Bardhë dhe të shkonte në një tubim parazgjedhor në Kansas.
"Ndoshta edhe zgjedhjet e manipuluara do të bëheshin përsëri të drejta"
Komentet e tij lidhur me New Mexico – një shtet ku ai humbi zgjedhjet në vitin 2024 me një diferencë prej gjashtë pikësh përqindjeje – vijnë në një kohë kur republikanët janë të shqetësuar për mundësinë e humbjes së shumicës në Kongres këtë nëntor. Sipas sondazheve, votuesit mendojnë se presidenti nuk i kushton vëmendje të mjaftueshme problemeve serioze me të cilat përballet vendi.
Trump sugjeroi se, nëse shteti ndryshon emrin e vet, "vlera e pronës dhe të ardhurat do të rriteshin". Ai gjithashtu përsëriti pretendimet e tij për zgjedhje të manipuluara, duke shtuar: "Ndoshta edhe zgjedhjet e manipuluara – për të cilat New Mexico është i njohur – do të bëheshin përsëri të drejta!"
Trump më parë kishte propozuar ndryshimin e emrit të New Mexico-s, megjithëse jo me kaq këmbëngulje. Në shtator, ai publikoi në rrjetet sociale një hartë të këtij shteti, ku fjala "Meksikë" ishte e fshirë dhe zëvendësuar me "Amerikë". Ajo foto më pas u shpërnda edhe nga profili zyrtar i Shtëpisë së Bardhë në rrjetin social "X".
