(Video) Avion privat me 9 persona u rrëzua në shtëpi në Florida: të gjithë vdiqën

Një avion privat luksoz "Learjet 60", në të cilin ndodheshin nëntë persona, u rrëzua mbrëmë në një zonë banimi në Florida. Të gjithë nëntë personat në avion vdiqën. Avioni ra vetëm 14 kilometra larg "Mar-a-Lago" – rezidencës së presidentit amerikan Donald Trump në qarkun Palm Beach.

Avioni kishte nisur nga Aeroporti Ndërkombëtar i Austin, Texas. Ndërsa ishte mbi Florida, avioni u kthye papritur djathtas dhe filloi të zbresë në mënyrë të pakontrolluar nga një lartësi rreth 2,400 metrash, duke u drejtuar direkt drejt tokës. Pak para goditjes, avioni goditi një pemë dhe rrëzoi linja elektrike; dëshmitarët thanë se zëri i goditjes dukej si zëri i një projektili.

"Tragjedi e tmerrshme"
Sekretari amerikan i Transportit, Sean Duffy, konfirmoi se të nëntë personat në avion vdiqën në aksident, duke e përshkruar incidentin si "një tragjedi të tmerrshme".

Administrata Federale e Aviacionit e SHBA-së (FAA) konfirmoi se në avionin që po fluturonte drejt aeroportit "North Eleuthera" në Bahamas, ndodheshin nëntë persona, por identitetet e tyre ende nuk janë publikuar.

Gjatë goditjes, avioni shpërtheu, duke shkatërruar plotësisht të paktën një shtëpi të montuar dhe duke lënë pas një krater dhe mbetje të djegura. Shërbimi i zjarrfikësve dhe shpëtimit në qarkun Palm Beach e shpalli aksidentin si një ngjarje me shumë viktima, megjithëse numri total i të vdekurve dhe të plagosurve mbetet i panjohur për momentin.

Policia mbylli të gjitha rrugët përreth në Greenacres dhe bëri thirrje për shoferët që të shmangin plotësisht zonën derisa të përfundojë hetimi dhe fikja e zjarrit. Hetimin për shkaqet e aksidentit e mori në dorë Bordit Kombëtar të Sigurisë në Transport (NTSB), i cili pritet të publikojë sot raportin e parë paraprak.