(Video) Burra në të zeza mblidhen në Parkun Pionirski në Beograd dhe po lëvizin drejt Presidencës

Një numër i madh burrash të veshur me të zeza po mblidhen në Parkun Pionirski në Beograd, dhe më pas po lëvizin drejt Presidencës së Serbisë, raporton N1, në një periudhë tensioni të shtuar para publikimit të projeksioneve të para zgjedhore.

Sipas informacionit të medias, hapësira në park gradualisht po mbushej, ndërsa grupi i burrave po drejtohej drejt selisë së presidencës serbe.

Lëvizja e grupit vjen në një kohë kur forcat opozitare, organizatat studentore dhe përfaqësuesit evropianë paralajmërojnë për incidente dhe provokime të mundshme pas mbylljes së vendvotimeve.

Demokratët evropianë njoftuan se kanë marrë paralajmërime se rreth orës 21:00 mund të organizohet një tubim i mbështetësve të Partisë Progresive Serbe (SNS). Sipas informatave të lidhura me listën studentore, këto tubime mund të krijojnë presion në terren dhe të shkaktojnë përplasje në momentin kur fillojnë të publikohen rezultatet e para.

Për shkak të këtyre paralajmërimeve, Demokratët evropianë kërkuan reagim urgjent nga policia dhe institucionet përgjegjëse për mbrojtjen e votuesve, kandidatëve, vëzhguesve dhe studentëve.

Lëvizja studentore, nga ana tjetër, i ka thirrur mbështetësit e saj të qëndrojnë të qetë, të ndjekin rezultatet nga shtëpitë e tyre dhe të mos dalin në rrugë për shkak të provokimeve të mundshme.

Në Beograd është forcuar prania e forcave të sigurisë pranë institucioneve kyçe shtetërore dhe selive të partive politike. Deri tani nuk ka konfirmim të pavarur që tubimi në Parkun Pionirski lidhet me një plan për të shkaktuar përplasje.