(Video) Përmbytje në rrugë, shira të rrëmbyeshëm morën makina, shkolla të mbyllura: mot i keq goditi Greqinë

Moti i keq goditi disa pjesë të Greqisë, ndërsa situata më e rëndë u regjistrua në Atikë, Skiathos dhe Evia, ku shirat e bollshëm shkaktuan përmbytje, probleme me trafikun dhe ndërprerje në furnizimin me energji elektrike.

Makinat u morën nga shira të rrëmbyeshëm në Skiathos, ndërsa lumi Kirias u derdh në Evia, duke mbyllur disa rrugë, raporton Tanea.gr.

Sipas mediave greke, Evia praktikisht është ndarë përsëri në dy pjesë, pasi derdhja e lumit kërcënoi seriozisht lidhjen rrugore midis pjesës veriore të ishullit dhe Halkidës.

Kryetari i komunës Mantudi-Limni-Agia Ana, Jorgos Kapurniotis, deklaroi për portalin evima.gr se për shkak të derdhjes së lumit Kirias, trafiku drejt Halkidës po zhvillohet përkohësisht në rrugë alternative përmes Metohias dhe Dafnusas.

Për shkak të shirave të bollshëm, rruga që lidh Mantudin dhe Prokopin, pranë vendit Kant, si dhe pjesa në zonën Porta, u mbyllën. Autoritetet paralajmëruan shoferët të jenë veçanërisht të kujdesshëm dhe të mos përpiqen të kalojnë rrugë të përmbytura.

Probleme u regjistruan edhe në Nea Artaki, ku pati ndërprerje në furnizimin me energji elektrike që nga orët e hershme të mëngjesit.

Skiathos është ndër zonat më të goditura. Shiu i bollshëm përmbyti rrugën kryesore për këmbësorë dhe rrugët anësore, ndërsa uji hyri në dyqane dhe ndërtesa banimi.

Dy makina u morën nga shirat e rrëmbyeshëm, dhe u regjistruan ndërprerje në furnizimin me energji elektrike.

Në orët e hershme të mëngjesit, Shërbimi i Mbrojtjes Civile dërgoi paralajmërim urgjent përmes sistemit 112, duke i thirrur banorët dhe vizitorët të shmangin lëvizjet e panevojshme.

"Ngjarje të forta meteorologjike në ishullin Skiathos. Kufizoni lëvizjen vetëm në atë që është absolutisht e nevojshme. Ndiqni udhëzimet e autoriteteve kompetente", thuhet në paralajmërim.

Autoritetet lokale i ftuan qytetarët të mos kalojnë rrugë të përmbytura, përrenj dhe rrjedha të rrëmbyeshme.

Kryetari i komunës ka ndërmend të kërkojë që ishulli të shpallet zonë e prekur nga katastrofa natyrore, për shkak të shkallës së dëmeve dhe problemeve të shkaktuara nga stuhia.

Shirat e bollshëm shkaktuan probleme serioze edhe në Atikë, duke përfshirë qendrën e Athinës, Pireun, Peramun, Megaran, si dhe pjesë të Atikës perëndimore dhe lindore.

Policia e trafikut vendosi devijime në disa segmente për shkak të grumbullimit të ujit në rrugë.

Moti i keq vazhdoi edhe të mërkurën, më 14 tetor, dhe Shërbimi Kombëtar Meteorologjik Grek mbajti paralajmërimin e kuq për Evian, ku priten shirat e bollshëm dhe stuhitë e forta deri në orët e vona të pasdites.

Paralajmërim portokalli është lëshuar për Greqinë lindore-qendrore dhe Atikën, si dhe për Sporadet dhe rajonin e Magnezisë.

Ngjarje intensive meteorologjike priten edhe në Halkidiki, Peloponezin veriloqindor, Kikladet, Dodekaneset dhe Kretë.