(Video) Sultani i Omanit mbërrin në Kinë me ofertë për Xi

Presidenti kinez Xi Jinping dhe sultani i Omanit, Haytham bin Tariq al-Said u takuan sot në Pekin për të diskutuar për forcimin e lidhjeve ekonomike dhe politike midis dy vendeve. Sultani i Omanit propozoi nënshkrimin e një marrëveshjeje konkrete për tregti dhe investime, e cila do të mundësonte shkëmbim më të madh të mallrave dhe investime të reja, transmeton Reuters.

"Jemi të bindur se një marrëveshje e tillë do të hapë mundësi të reja për tregti dhe investime, duke lehtësuar dhe përmirësuar bashkëpunimin ekonomik dhe investues midis dy vendeve tona", deklaroi sultani në fillim të takimit me Xi në Sallën e Madhe të Popullit në Pekin.

Omani dëshiron tregti më të madhe me Kinën
Omani ka për qëllim të rrisë tregtinë me Kinën dhe të nisë projekte të përbashkëta përmes fondeve të investimeve. Sipas agjencisë shtetërore të lajmeve të Omanit, sultani theksoi burimet e rinovueshme të energjisë, inteligjencën artificiale, teknologjitë digjitale, industrinë hapësinore dhe mbrojtjen si fusha potenciale për bashkëpunim.

Kina është tashmë partneri më i madh tregtar i Omanit, ku Omani eksporton naftë të papërpunuar dhe produkte të tjera energjetike në këtë vend. Lidhjet ekonomike dhe turistike janë forcuar më tej pas nisjes së fluturimeve direkte midis Pekinit dhe Muskatit në nëntor të kaluar. Në të njëjtën kohë, Omani po punon për zhvillimin e kapaciteteve të prodhimit dhe furnizimit në sektorin e burimeve të rinovueshme të energjisë, si dhe në fushën e tregtisë digjitale.

Xi: Dëshirojmë të ngrisim marrëdhëniet në një nivel më të lartë
Xi Jinping deklaroi se Kina e sheh thellimin e marrëdhënieve me Omanin si një zgjedhje strategjike të përbashkët të dy vendeve. "Jam i gatshëm të punoj me ju për të ngritur partneritetin strategjik midis Kinës dhe Omanit në një nivel edhe më të lartë, duke shërbyer më mirë popujve të dy vendeve tona dhe duke kontribuar për paqen, stabilitetin dhe prosperitetin në rajon", tha Xi, sipas raporteve të gazetarëve që ndoqën takimin.

Sultani Haytham mbërriti në Pekin dje për një vizitë dyditore. Kjo është vizita e parë e një kreu të shtetit oman në Kinë që nga vendosja e marrëdhënieve diplomatike midis dy vendeve në vitin 1978. Në aeroport e prit guvernatori i bankës qendrore kineze, Pan Gongsheng. Gjatë vizitës, udhëheqësi oman theksoi veçanërisht rëndësinë e bashkëpunimit midis institucioneve investuese dhe financiare të dy vendeve.