(Video) Trump ofendon gazetaren për shkak të një pyetjeje: “Je budalla, ke një koeficient të ulët inteligjence”
Presidenti amerikan Donald Trump të mërkurën u përplas verbalisht me gazetaren e CNN, Kaitlan Collins, para Shtëpisë së Bardhë, duke e quajtur atë person me koeficient të ulët inteligjence dhe budalla.
Debati filloi kur Collins e pyeti Trump nëse vendimi i tij për heqjen e sanksioneve ndaj Rusisë lidhej me lirimin e Steven Hubbard, një profesor amerikan që ishte në paraburgim në Rusi që nga viti 2022.
Trump mbrojti negociatat me Rusinë për lirimin e Hubbard, por Collins vazhdoi të kërkonte përgjigje. Presidenti pretendonte se vendimi për sanksionet ishte i nevojshëm për negociatat dhe se Hubbard përndryshe nuk do të ishte liruar. Collins i përgjigjej se kjo në fakt do të thoshte që administrata amerikane kishte dhënë diçka në këmbim.
"Nuk ke asnjë ide për çfarë flet", i tha Trump. "Je budalla. Je një person me koeficient të ulët inteligjence. Je budalla dhe punon për CNN."
"Nëse unë negocioj që të kthejmë një person për të cilin kemi tentuar për vite, një person që ka qenë i burgosur në Siberi ose në ndonjë vend tjetër në Rusi, atëherë e kthejmë falë meje", shtoi ai.
Collins pyeti përsëri nëse heqja e sanksioneve lidhej me lirimin e Hubbard, pasi Trump deklaroi se nuk kishte bërë asnjë koncesion për të siguruar kthimin e amerikanit.
Presidenti hodhi poshtë pyetjen e saj, por përsëriti se vendimi kishte ndihmuar në lirimin e tij.
"Fillo të përdorësh trurin", i tha Trump.
Gazetarja kështu tregoi një kundërshtim të drejtpërdrejtë në deklaratat e tij, pasi Trump fillimisht pretendonte se SHBA nuk i kishte bërë asnjë koncesion Rusisë, dhe më pas vetë pranoi se profesori nuk do të ishte liruar nëse Uashingtoni nuk do të hiqte sanksionet ndaj Moskës.
Kjo ishte një përplasje e re publike midis Trump dhe Collins, dhe gjithashtu debati i dytë i presidentit amerikan me gazetarë brenda vetëm dy ditësh.
Më parë këtë javë Trump u përplas edhe me një gazetar tjetër gjatë një konference për shtyp në Zyrën Ovale. Ekipi i tij i reagimit të shpejtë njoftoi se bëhej fjalë për Andrew Feinberg, korrespondent i britanikut "Independent".
Debati ndodhi ndërsa Trump po përgjigjej në pyetje gazetareske. I dukshëm i nervozuar, presidenti në një moment iu drejtua drejtpërdrejt gazetarëve.
"Çfarë nuk shkon me ty?", e pyeti Trump. "Je i sëmurë?"
"Sa di unë, nuk jam, zotëri", u përgjigj gazetari.
"Mendoj se diçka nuk shkon me ty", i tha Trump.
Trump më parë i kishte thënë Feinberg të “kujdeset”, pasi gazetari pyeti pse programi i ri për sinjalizuesit e parregullsive ofron vetëm një përqindje shpërblimi, ndërsa Ligji për Kërkesat e Rreme parashikon të paktën 10 përqind.
Zëvendëspresidenti J.D. Vance e vlerësoi pyetjen si “jashtëzakonisht të padrejtë”.
"Ligji për Kërkesat e Rreme nuk mbulon më shumë se 99 përqind të mashtrimeve që zbulojmë në qeverinë federale", tha Vance.
"Presidenti dëshiron që për çdo mashtrim, nëse e zbuloni dhe siguroni prova që na lejojnë të rikuperojmë paratë, të merrni kompensim. Kjo do të aplikohej për të gjitha rastet, jo vetëm për atë pjesë të vogël që mbulon ligji aktual", shtoi ai.
Trump bëri komentet për “personin e sëmurë” më vonë, kur Feinberg filloi të bënte pyetje për fushat e golfit të Trump.
Presidenti e ndërpreu dhe i tha të “heshtë”, kështu që pyetja nuk u përfundua, as nuk u bë publike se çfarë donte të pyeste saktësisht gazetari.
