(Video) Ukraina ka përgjigje për dronët më të shpejtë rusë

Ish-ministri ukrainas i Mbrojtjes, Mihailo Fedorov – i njohur për përkushtimin e tij ndaj inovacioneve teknologjike të shpejta në ushtri – prezantoi një dron-interceptor të ri të destinuar për shkatërrimin e dronëve më të shpejtë luftarakë rusë. Aktualisht dronin e kontrollon një pilot, por Fedorov deklaroi se planifikon ta automatizojë plotësisht me ndihmën e inteligjencës artificiale, me qëllim që deri në fund të vitit të arrihet një prodhim mujor prej qindra njësive, shkruan "Business Insider".

Ukraina po përdor gjithnjë e më shumë dronë autonomë dhe robotë të pajisur me inteligjencë artificiale. Këto sisteme mund të funksionojnë në mënyrë të pavarur, madje edhe në situata kur sistemet e luftës elektronike ndërpresin lidhjen me operatorin. Droni i ri-interceptor është përgjigje e inxhinierëve ukrainas ndaj numrit në rritje të dronëve rusë të pajisur me motorë me reaktiv. Këta dronë janë ndjeshëm më të shpejtë se modelet më të vjetra me propelerë dhe përbëjnë një objektiv të vështirë për mbrojtjen ajrore ukrainase. Zhvillimi i këtij modeli është pjesë e një trendi më të gjerë të futjes së interceptuesve me inteligjencë artificiale, të cilët kërkojnë kontroll minimal njerëzor.

Interceptor i ri kundër "Geran-5"

Kompani ukrainase të mbrojtjes tashmë kanë zhvilluar disa modele interceptuesish të aftë t'u kundërvihen dronëve më të shpejtë rusë "Geran-5", të cilët përdorin motor mini-turboreaktiv për të arritur shpejtësi deri në 600 km/h. Shpejtësia e saktë e interceptuesit të ri nuk është bërë publike, por një njësi e specializuar e Gardës Kombëtare Ukrainase tashmë ka rrëzuar dy dronë "Geran-5" gjatë testimeve të fundit mbi Kiev.

Fedorov konfirmoi se testimet vazhdojnë, pas të cilave do të vijë përmirësimi i teknologjisë dhe fillimi i prodhimit në masë. Ai theksoi se interceptuesi do të jetë shumë ekonomik. "Që nga fillimi, qëllimi ynë ishte të zhvillonim një zgjidhje të lirë për prodhim në masë, që mund të implementohet shpejt", deklaroi ai.

Gjatë mandatit të tij gjashtëmujor në krye të Ministrisë së Mbrojtjes, më parë këtë vit, Fedorov insistoi në një modernizim gjithëpërfshirës të ushtrisë, veçanërisht përmes robotizimit. Gjatë asaj periudhe u arritën rezultate të rëndësishme ushtarake, kryesisht falë përdorimit të dronëve.

Pas largimit nga detyra në korrik, Fedorov themeloi një kompani mbrojtëse të fokusuar në zhvillimin e teknologjisë ushtarake, me qëllim forcimin e Ukrainës dhe bashkëpunimin me partnerë ndërkombëtarë. Në fillim të shtatorit, ai njoftoi se investitori i parë është Alex Karp, drejtori i kompanisë amerikane për analizë të të dhënave dhe inteligjencë artificiale "Palantir".

Të hënën, Fedorov njoftoi se planifikon të investojë më tej në kërkimin, zhvillimin dhe ekipin inxhinierik ukrainas që qëndron pas interceptuesit. Ai theksoi se e konsideron pronësinë intelektuale të projektit si kyçe për kompaninë e tij të re. Planifikon ta hapë projektin edhe për investitorë të tjerë, dhe rundi i parë i financimit pritet së shpejti.