Zaharova paralajmëroi masë reciproke: Rusia vendos viza për qytetarët e Malit të Zi

Qytetarët e Malit të Zi do të duhet të kenë viza për hyrje në Rusi për shkak të vendimit të Podgoricës për të hequr regjimin pa viza për qytetarët rusë, deklaroi zëdhënësja e Ministrisë ruse të Punëve të Jashtme, Marija Zaharova.

"Si pasojë, qytetarët malazezë gjithashtu do të duhet të marrin viza për udhëtim në Rusi. Ky vendim i Podgoricës qartë dëmton interesat malazeze", tha Zaharova për gazetën "Izvestia", duke komentuar vendosjen e regjimit të vizave për rusët duke filluar nga 1 nëntori.

Siç vlerësoi ajo, "në emër të shpresave evropiane, arritjet shumëvjeçare në marrëdhëniet ruso-malazeze po shkatërrohen vazhdimisht, dhe nuk i kushtohet vëmendja e duhur pasojave ekonomike të këtyre hapave".

Sipas saj, masat e reja të Podgoricës do të ulin fluksin turistik nga Rusia, do t'i dëmtojnë kompanitë malazeze dhe do të çojnë në përkeqësimin e klimës së investimeve në vend.

"Në të njëjtën kohë, natyrisht, është e pakuptimtë që autoritetet malazeze të presin kompensim nga Brukseli për humbjet e pashmangshme", shtoi ajo.

Zaharova tha se procesi i integrimit në BE, i cili inkurajoi Malin e Zi të vendosë viza për rusët, "në asnjë mënyrë nuk nënkupton mundësinë që anëtarët e rinj të mbajnë status neutral".

"Shpresojmë që vendet e Ballkanit Perëndimor do të shohin këto ndryshime në BE, do t'i analizojnë dhe do të kuptojnë qartë pasojat e integrimit evropian për interesat e tyre kombëtare dhe mirëqenien e qytetarëve të tyre", përfundoi zëdhënësja e Ministrisë ruse të Punëve të Jashtme, e cituar nga Tanjug.