Zëdhënësja e shkarkuar e Trump tallte tualetet kineze; Kina i përgjigjet

Kina e ka ftuar ish-zëdhënësen e Shtëpisë së Bardhë, Katie Zakaria, që ta vizitojë më shpesh vendin pasi në një intervistë të fundit pretendoi se „ata nuk kanë tualete të denja“.

Zakaria u shkarkua pak më pak se një javë pas marrjes së detyrës, pasi u vu nën vëzhgim publik. Ajo dha komentet për tualetet kineze gjatë intervistës me podkasterin Jack Posobiec.

„E mbaj mend shumë qartë sepse isha në Kinë dhe pyesja veten se si Kina mund të ishte fuqia e madhe e ardhshme në skenën botërore. Ata madje nuk kanë tualete të denja“, tha Zakaria, duke iu referuar perceptimit në atë kohë para zgjedhjeve presidenciale në SHBA në 2016 që epoka e artë e Amerikës kishte përfunduar dhe Kina ishte në ngritje.

Hapësira zhvillimore në Kinë është ende e madhe
Kur u pyet për komentet të premten, zëdhënësja e Ministrisë kineze të Punëve të Jashtme, Mao Ning, iu përgjigj me ironi: „Ajo është e mirëpritur të vizitojë Kinën më shpesh kur ka mundësi“.

Në platformën kineze të mediave sociale Weibo, një platformë e njohur e ngjashme me X, shumë e quajtën komentet e Zakarias „budallaqe“, ndërsa të tjerë pranuan se disa tualete kineze nuk përmbushnin standardet e duhura një dekadë më parë.

Një zyrtar i Shtëpisë së Bardhë më parë i tha „CNN“ se Zakaria kishte jetuar në Kinë me bashkëshortin e saj. Në profilin e saj në LinkedIn thuhet se ajo ka punuar si bashkëpunëtore në ekipin ndërkombëtar të një prej firmave më të mëdha ligjore në Kinë, „Zhong Lun“, në Pekin për gati dy vjet, duke filluar nga viti 2011.

Zakaria në një deklaratë pretendoi se merrej me të drejtën ndërkombëtare transaksionale dhe se kishte „të gjitha kualifikimet e duhura“.

Sidoqoftë, sipas Ministrisë së Drejtësisë së Kinës, vetëm shtetasit kinezë kanë të drejtë të ushtrojnë profesionin e avokatit në Kinë, prandaj nuk është e qartë se çfarë kualifikimesh mund të ketë pasur Zakaria.

Foto: EPA