Vazhdojnë kontrollet e jashtëzakonshme inspektuese në tregjet e gjelbra

Agjencia për Ushqim dhe Veterinari (AHV) vazhdon me zbatimin e kontrolleve të jashtëzakonshme të përforcuara inspektuese në tregjet e gjelbra, me qëllim, siç thonë, luftimin e tregtisë së paligjshme me fruta dhe perime dhe shitjen e ushqimit në kushte të papërshtatshme, pa origjinë, kryesisht nga shitësit përsëritës që tregtojnë jashtë hapësirave të organizuara të tregut.

"Java e kaluar, në kuadër të aksioneve të zhvilluara në Tregun e Gjelbër të Shkupit dhe në tregun në lagjen Gjorgje Petrovi, janë sekuestruar dhe shkatërruar mbi 5 ton ushqim i pasigurt. Bëhet fjalë kryesisht për fruta dhe perime që shiteshin në mënyrë të paligjshme, jashtë tregut, duke rrezikuar drejtpërdrejt sigurinë e konsumatorëve, por edhe duke dëmtuar konkurrencën në treg, në dëm të prodhuesve primarë bujqësorë dhe tregtarëve ligjorë.

Kontrollet kryhen në koordinim me inspektoratin komunal të Qytetit të Shkupit, Ministrinë e Punëve të Brendshme dhe Inspektoratin Shtetëror të Tregut, me qëllim parandalimin e tregtisë së paligjshme dhe sigurimin e kushteve ligjore për shitjen e ushqimit.

Agjencia për Ushqim dhe Veterinari do të vazhdojë me zbatimin e kontrolleve të përforcuara edhe në periudhën në vijim, në lokacione të ndryshme në Shkup dhe në të gjithë vendin. Qëllimi është mbrojtja e shëndetit të konsumatorëve, parandalimi i qarkullimit të ushqimit të pasigurt dhe krijimi i kushteve të ndershme për punë të tregtarëve ligjorë dhe prodhuesve primarë bujqësorë", njoftojnë nga AHV.