Mucunski për Korridorin 8 në Sofje: Lidhshmëria është një instrument strategjik për sigurinë, rezistencën dhe zhvillimin ekonomik

Sot në Sofje, me ftesë të ministres së Punëve të Jashtme të Republikës së Bullgarisë, Velislava Petrova-Çamova, ministri i Punëve të Jashtme dhe Tregtisë së Jashtme, Timço Mucunski, mori pjesë në Konferencën Ndërkombëtare për Korridorin 8, ku foli në panelin në nivel të lartë "Konteksti gjeostrategjik i Korridorit 8".

Konferenca Ndërkombëtare, e cila u mbajt disa muaj pas takimit ministror për Korridorin VIII në Tiranë, më 18 shkurt të këtij viti, përfaqëson një vazhdim të sesionit inaugurues të mbajtur në Brindizi, Itali, më 27 korrik 2023. Në fokus të bisedimeve deri tani ishin projektet aktuale infrastrukturore përgjatë Korridorit 8, si dhe sfidat për të cilat kërkohet vëmendje më e madhe politike.

Në kushte të një realiteti gjeopolitik të ndryshuar dhe sfidave të shtuar për siguri dhe ekonomi, pjesëmarrësit riafirmuan pozicionin se projektet infrastrukturore përgjatë Korridorit 8 duhet të funksionojnë si një sistem i vetëm ndërkufitar, dhe jo si një seri projektesh të ndara që përfundojnë në kufijtë shtetërorë.

Në fjalimin e tij, Mucunski theksoi se Korridori 8 prej kohësh ka kaluar kufijtë e infrastrukturës tradicionale të transportit dhe sot ka një rëndësi thelbësore evropiane, ekonomike dhe të sigurisë. Ai nënvizoi se korridori përfaqëson një vizion strategjik që lidh Detin Adriatik dhe Detin e Zi, Bashkimin Evropian dhe Ballkanin Perëndimor, si dhe ekonomitë, shoqëritë dhe interesat e sigurisë së vendeve përgjatë rrugës së tij.

"Në kohë të fragmentimit gjeopolitik, zinxhirëve të prishur të furnizimit dhe konkurrencës së rinovuar për infrastrukturën kritike, këto korridore përfaqësojnë instrumente për rezistencë, stabilitet dhe prosperitet të përbashkët", theksoi Mucunski, duke shtuar se Korridori 8 është një prioritet strategjik kombëtar dhe një pjesë e rëndësishme e përpjekjeve më të gjera për integrimin e Ballkanit Perëndimor në arkitekturën evropiane ekonomike dhe infrastrukturore.

U vu theksi i veçantë në nevojën që marrëveshjet politike të përkthehen në realizim konkret. Në këtë kontekst, ministri iu referua hyrjes në fuqi të Marrëveshjes me Bullgarinë për përgatitjen, ndërtimin dhe funksionimin e tunelit hekurudhor ndërkufitar, si dhe punës së deritanishme të Komisionit të Përbashkët të ngarkuar për zbatimin e saj.

Mucunski theksoi se Korridori 8 duhet të zhvillohet si një sistem i vetëm ndërkufitar, me një dinamikë të koordinuar përgjatë gjithë rrugës. "Qytetarët tanë dhe partnerët tanë evropianë, në fund, do ta vlerësojnë Korridorin 8 sipas infrastrukturës që do të ndërtojmë realisht, dhe jo sipas numrit të takimeve që do të mbajmë", u shpreh ai.

Në konferencë u theksua edhe rëndësia më e gjerë e Korridorit 8 si një platformë për bashkëpunim në transport, energjetikë, lidhje digjitale, tregti, investime, logjistikë dhe siguri.

Mucunski konfirmoi gatishmërinë për bashkëpunim të ngushtë të mëtejshëm me Bullgarinë, Shqipërinë dhe partnerët evropianë në kapërcimin e ngushticave, sigurimin e fondeve dhe përshpejtimin e realizimit të Korridorit 8.

Gjithashtu, konfirmoi gatishmërinë e shtetit tonë për të qenë nikoqir i takimit të ardhshëm ministror për Korridorin 8, duke theksuar se realizimi i tij duhet të kontribuojë në lidhshmëri më të fortë rajonale, siguri, prosperitet dhe integrim evropian.