Nuk do të ketë rritje të çmimit të energjisë elektrike deri në fund të vitit, siguron Mickoski
Kryeministri Hristijan Mickoski siguron se Qeveria do të vazhdojë të angazhohet që çmimi i energjisë elektrike për familjet të mbetet i pandryshuar edhe në periudhën e ardhshme rregullatore.
Ai tha se ruajtja e stabilitetit energjetik dhe mbrojtja e standardit të qytetarëve po zhvillohen në kushte të krizës më të madhe energjetike botërore, kur çmimet në bursat e rajonit dhe Evropës po thyejnë rekorde.
Kur u pyet nëse AD ESM do të ofrojë një çmim më të ulët apo më të lartë se 65 euro për megavat-orë deri tani, Mickoski theksoi se në kushtet aktuale të bursës, ky çmim është madje trefish më i ulët se ai që paguajnë qytetarët në vendet fqinje dhe në Evropë.
„Kudo në rajon dhe në Evropë çmimet e energjenteve po thyejnë rekorde. Ka vende në Evropë ku çmimi i naftës dizel është mbi tre euro, ndërsa tek ne është nën 1.6 euro falë masave të Qeverisë. Në këtë drejtim planifikojmë të vazhdojmë edhe për energjinë elektrike. Ne luftojmë dhe prioriteti ynë është që çmimi të mbetet i njëjtë dhe të mos ketë rritje“, theksoi Mickoski.
Sipas tij, çmimi përfundimtar nuk varet vetëm nga ESM, por nga kërkesat e disa subjekteve në sistem, përfshirë operatorin dhe distributorin privat EVN.
„Çmimi mbetet i njëjtë deri në fund të vitit, domethënë edhe në nëntor dhe dhjetor. Ndërsa për atë që do të ndodhë nga 1 janari, le të presim të shohim çfarë do të thonë kompanitë energjetike. Unë nuk mund të parashikoj vendimin e Komisionit Rregullator“, theksoi Mickoski.
