Prokuroria nuk gjeti prova për vepër penale, por u konstatuan dobësi sigurie në sistemin kompjuterik të Kabinetit të presidentes

Pas kryerjes së një procedure paraprake hetimore lidhur me pretendimet nga kallëzimi penal me dyshime për hyrje të paautorizuar në sistemin kompjuterik në Kabinetin e Presidentes së Republikës së Maqedonisë së Veriut dhe mbledhje të paautorizuar të të dhënave, prokurori kompetent nga Prokuroria Themelore Publike për Ndjekjen e Krimit të Organizuar dhe Korrupsionit mori një Rezolutë me të cilën vlerësoi se nuk ka bazë për procedim të mëtejshëm penal, njoftuan nga Prokuroria Publike.

"Gjatë procedurës, me urdhër të Gjykatës Themelore Penale u sigurua pajisje kompjuterike mbi të cilat u kryen analiza informatiko-forenzike. U analizuan edhe të dhëna nga pajisje mobile dhe u mblodhën edhe deklarata nga persona të njohur me ngjarjen.

Sipas raporteve të Sektorit për Krim Kompjuterik pranë MPB-së, nuk u gjetën gjurmë digjitale apo tregues të tjerë forenzikë për hyrje të paautorizuar në sistemin kompjuterik, as nuk u gjetën prova për regjistrim dhe mbledhje të të dhënave të klasifikuara.

Gjatë analizave u konstatuan disa dobësi sigurie dhe administrative në konfigurimin e sistemit, të cilat mund të përbënin një rrezik potencial sigurie, por nuk u gjetën prova digjitale për kryerjen e veprave penale të raportuara.

Pas vlerësimit të të gjitha provave të mbledhura, prokurori kompetent konstattoi se nuk plotësohen elementët ligjorë të veprave penale "Zbulimi i sekretit shtetëror" nga neni 317 dhe "Dëmtimi dhe hyrja e paautorizuar në sistem kompjuterik" nga neni 251 i Kodit Penal, as edhe për ndonjë vepër tjetër penale që ndiqet nga zyrtarët", thuhet në informacionin nga Prokuroria.