Alegri i ndëshkuar për dy ndeshje, mungon në derbin kundër "Juventusit" të tij

Trajneri i Napolit, Massimiliano Allegri, është pezulluar për shkak të kartonit të kuq ndaj Romës, që do ta lërë jashtë lojës për dy ndeshjet e ardhshme të kampionatit të skuadrës, përfshirë edhe derbin në Serie A kundër Juventusit.

Fundi kaotik i ndeshjes mes Napolit dhe Romës (3:3) në javën e 8-të të Serie A mori epilogun e tij. Trajneri i skuadrës vendase, Massimiliano Allegri, është pezulluar për dy ndeshje, njoftoi Komisioni Disiplinor i ligës.

Allegri humbi durimin plotësisht në fund të ndeshjes pasi Leonardo Balerdi shënoi gol në minutën e 89-të për 3:3.

Trajneri italian mori karton të kuq direkt për shkak të protestave të ashpra, pas së cilës vijoi reagimi i tij karakteristik – hoqi pallton dhe doli vrap jashtë fushës.

Disa momente më vonë, Allegri u kthye në stol, dhe anëtarët e stafit të tij trajnerik duhej ta ndalonin për të mos shkaktuar një incident edhe më të madh.

Komisioni Disiplinor i dha dënim pezullimi prej dy ndeshjesh, që është një problem shtesë për "Napolitanët".

Allegri nuk do të mund ta drejtojë skuadrën në raundin e ardhshëm kundër Monzës, por ajo që ka më shumë rëndësi është se nuk do ta drejtojë Napolin në ndeshjen jashtë fushe kundër klubit të tij të mëparshëm Juventus më 1 nëntor.

Kthimi në Torino dhe përballja kundër skuadrës me të cilën fitoi shumë tituj duhej të ishte ngjarja qendrore e javës, por Allegri do ta ndjekë spektaklin në stadiumin "Allianz" nga tribunat ose lozhat, në vend të stolit.

Pas tetë ndeshjeve të luajtura, Napoli është në vendin e dhjetë në tabelën e Serie A me 11 pikë.

Foto/ Depositphotos