(VIDEO) Astronautja franceze vendos rekord: Kthehet në Tokë pas 237 ditësh në hapësirë

Astronautja Sophie Adeno u kthye në Tokë pas një misioni tetëmujor me të cilin u vendos një rekord i ri për qëndrimin më të gjatë në hapësirë nga një astronaut evropian. Ajo dje u largua nga Stacioni Ndërkombëtar i Hapësirës, dhe sot rreth orës 17:30 u ul në oqean së bashku me tre anëtarë të tjerë të ekuipazhit, transmeton Euronews.

Pas një udhëtimi njëditor, kapsula me astronauten franceze u ul në Oqeanin Paqësor – pranë bregut të San Diegos – sot në orën 17:35 sipas kohës franceze. Adeno kaloi 235 ditë në një lartësi prej 400 kilometrash. Me të u kthyen edhe kosmonauti rus Andrej Fedjaev dhe astronautët amerikanë Jessica Meir dhe Jack Hathaway.

Minutat e fundit të fluturimit ishin jashtëzakonisht të lodhshme. Ekuipazhi hyri në atmosferë me shpejtësi të madhe, pas së cilës anija kozmike u ngadalësua me ndihmën e parashutave të fuqishme. Komunikimi me Tokën u ndërpre gjatë kësaj faze të uljes.

Pas daljes nga kapsula dhe kontrollit të shkurtër mjekësor, katër astronautët do të transportohen në breg. Ajo së pari do të arrijë në bazën e marinës amerikane "North Island" në San Diego, nga ku do të vazhdojë drejt Qendrës Hapësinore "Johnson" të NASA-s në Houston.

Ekipi mjekësor i Agjencisë Evropiane të Hapësirës (ESA) do të kujdeset për Sophie Adeno gjatë fluturimit drejt Këlnit. Në Gjermani, astronautja do të takohet përsëri me familjen e saj dhe do të fillojë një program disa-ditor rikuperimi.

Në shkurt, Sophie Adeno u bë gruaja e dytë franceze që kaloi vijën Karman – kufiri i njohur ndërkombëtarisht i hapësirës. E para ishte Claudie Haigneré para tridhjetë vjetësh. Adeno është gjithashtu gruaja e parë franceze që ka kryer një ecje në hapësirë. Ajo realizoi tre ecje të tilla: më 18 dhe 25 gusht dhe më 1 shtator.

Me gjithsej 237 ditë të kaluara në hapësirë, kjo astronautë franceze vendosi rekord për fluturimin më të gjatë hapësinor evropian. Rekordi i mëparshëm mbahej nga astronauti italian Luca Parmitano, i cili kaloi 201 ditë në orbitë gjatë periudhës 2019-2020.