AfD sulmoi Merçin: „Ju jeni kancelari i Ukrainës“

Partia gjermane e ekstremit të djathtë Alternativa për Gjermaninë (AfD) bëri thirrje për ndalimin e ndihmës financiare dhe ushtarake për Ukrainën, duke pretenduar se miliardat e eurove që Gjermania i ndan për Kievin duhet të shpenzohen për nevoja të brendshme si pensionet, shkollat dhe rrugët.

Kjo kërkesë çoi në një debat të ashpër në Bundestagun gjerman, ku përfaqësuesit e kristiandemokratëve, socialdemokratëve dhe të gjelbërve u përballën me AfD-në, duke paralajmëruar se heqja dorë nga ndihma për Ukrainën do të rrezikonte vetë Gjermaninë në afat të gjatë.

Debati u zhvillua dje në kërkesë të AfD-së, me titullin „Udhëtimi i kancelarit Merç në Kiev – miliarda për Ukrainën me masa kursimi në Gjermani“.

„Detyra juaj është ndaj Gjermanisë, jo ndaj Ukrainës“
Markus Fronmaer, zëdhënësi për politikë të jashtme i AfD-së, pretendoi se që nga fillimi i pushtimit rus, Gjermania ka ndarë rreth 100 miliardë euro ndihmë bilaterale për Ukrainën, me 30 miliardë euro shtesë përmes Bashkimit Evropian.

Sipas tij, këto para mund të ishin përdorur për rindërtimin e shkollave, ndërtimin e autostradave ose për pagesën e 6,000 eurove për çdo pensionist gjerman.

„Detyra juaj është ndaj Gjermanisë, jo ndaj Ukrainës“, i tha ai qeverisë, duke e quajtur Fridrih Merçin „kancelar i Ukrainës“.

Fronmaer e akuzoi Merçin se ka ulur përfitimet sociale në Gjermani, ndërsa vazhdon të ndajë miliarda për ndihmë në Kiev.

„Merçi jep 130 miliardë euro nga paratë e taksave të popullit të tij gjerman, të cilin e quan të ngathët, për atdheun e tij të vërtetë, Ukrainën“, tha përfaqësuesi i AfD-së.

Ai tha se paratë nuk janë hedhur poshtë apo dhënë pa arsye, por janë përdorur për mbrojtjen e Ukrainës dhe, në mënyrë indirekte, për sigurimin e Evropës.

„Ne nuk i japim këto para. Ukraina që mbron veten e bën Gjermaninë dhe gjithë Evropën më të sigurt“, theksoi ai.

Deputeti i CDU-së, Nikolas Cipelius, gjithashtu paralajmëroi për sulmet hibride ruse dhe mundësinë që fitorja ruse të shkaktojë valë të reja refugjatësh dhe shpenzime shtesë për vendet evropiane.

Debora Diring, përfaqësuese e të Gjelbërve, reagoi në mënyrë të ngjashme, duke paralajmëruar se ndalimi i ndihmës ushtarake dhe financiare nuk do të sjellë paqe, por do ta detyrojë Ukrainën të kapitulojë.

„Në fund kjo do të sillte më shumë dhunë, më shumë luftëra në Evropë dhe më pak siguri“, tha ajo.

Diring beson se Rusia aktualisht nuk tregon gatishmëri të vërtetë për negociata.

Përfaqësuesi i SPD-së, Ralf Shtëgner, e akuzoi AfD-në se kundërshton sigurinë e brendshme dhe të jashtme të Gjermanisë dhe se një qasje e tillë i shkon në favor presidentit rus Vladimir Putin.

Sidoqoftë, ai bëri thirrje që partitë e tjera politike të marrin një qasje më serioze ndaj debatit për marrëdhëniet midis diplomacisë dhe ndihmës ushtarake.

„Nuk duhet të lejojmë që politika e paqes t’i lihet populistëve pa luftë“, tha Shtëgner.