Arriti reagimi i parë i Moskës ndaj rezultateve të zgjedhjeve në SHBA
Kursi i politikës së jashtme të Rusisë, përfshirë edhe qëndrimin e saj ndaj zgjidhjes së çështjes ukrainase, nuk varet nga rrethanat aktuale politike dhe nuk varet nga luhatjet politike në vende të tjera, deklaroi zëvendës-shefi i Ministrisë së Jashtme të Rusisë.
Sergej Rjabkov komentoi rezultatet e zgjedhjeve të mesit të mandatit në Shtetet e Bashkuara të Amerikës.
"Le të presim rezultatet përfundimtare. Qëndrimet e aktivistëve të Partisë Demokratike ndaj Rusisë janë jashtëzakonisht negative. Nuk ka asgjë të re në këtë", tha Rjabkov për "Sputnik".
Në këtë mënyrë, ai iu përgjigj pyetjes nëse rezultatet e zgjedhjeve shtesë mund të komplikojnë marrëdhëniet me SHBA-në, përfshirë edhe në kontekstin e zgjidhjes së çështjes ukrainase.
"Qëndrimi ynë parimor dhe i qëndrueshëm ndaj Ukrainës, si dhe kursi i politikës së jashtme në përgjithësi, nuk varen nga rrethanat aktuale politike dhe, sigurisht, nuk varen nga luhatjet politike në vende të tjera. Do të veprojmë në përputhje me udhëzimet e presidentit të Rusisë", përfundoi Rjabkov.
Sipas rezultateve paraprake dhe projeksioneve, në zgjedhjet e mesit të mandatit të mbajtura më 3 nëntor në SHBA fituan demokratët, të cilët në janar do të marrin shumicën si në Dhomën e Përfaqësuesve ashtu edhe në Senatin e Kongresit amerikan, duke marrë kështu kontrollin mbi të dyja dhomat e legjislativit.
