Fon der Lajen: Duhet të mbrojmë kufijtë e jashtëm të BE-së nga migracioni i paligjshëm

Kryetarja e Komisionit Evropian, Ursula fon der Lajen, bëri thirrje për masa më të ashpra për të luftuar migracionin e paligjshëm në një letër të dërguar te liderët e vendeve anëtare para samitit në Bruksel këtë javë, transmeton „Politico“.

Propozimet përfshijnë krijimin e një kornize për ndërhyrje të menjëhershme në situata kur migracioni përdoret si mjet presioni, zgjerimin e kompetencave të agjencisë kufitare „Frontex“ dhe rritjen e numrit të deportimeve nga Bashkimi.

Mbrojtja e kufijve të jashtëm
Letra vjen pas krizës migratore verore në enklavën spanjolle Ceuta, gjatë së cilës mbërritën rreth 70,000 migrantë nga Maroku.

„Duhet të parandalojmë kërcënimet e tilla dhe të bëjmë të qartë se kurrë nuk do të vëmë në dyshim mbrojtjen e kufijve tanë të jashtëm“, shkroi Fon der Lajen.

„Asnjë shtet apo aktor jostatal nuk do të lejohet të shfrytëzojë rregullat ose vlerat tona për të destabilizuar Bashkimin.“

Letra u dërgua te liderët e të gjitha 27 vendeve anëtare të BE-së dhe do të shërbejë si bazë për diskutimin mbi migracionin të planifikuar për të premten. Ky është dita e dytë e takimit të Këshillit Evropian këtë javë.