(Foto/Video) Protestat e dhunshme u përhapën në Milano: policia përdori topa uji

Valë protestash, që në javët e fundit kanë përfshirë Spanjën dhe Francën, arriti edhe në Itali dhe Portugali. Në Milano, demonstruesit u përplasën me policinë dhe shkaktuan zjarre, ndërsa në Lisbonë, gjatë fundjavës, u ngrit një kamp me çadra, raporton "The Guardian".

Protestat e së shtunës në qendër të Milanos, të drejtuara kundër kostove të larta të jetesës, filluan paqësisht, por përfunduan me dhunë. Persona të maskuar hodhën gurë, pllaka trotuari dhe objekte të tjera ndaj policisë për shpërndarjen e demonstratave. Ata gjithashtu ndezën barrikada të ndërtuara nga tavolina të marra nga lokale gastronomike.

Policia përdori topa uji dhe gaz lotsjellës për të shpërndarë turmën. Në pamjet nga vendi i ngjarjes shihet një automjet i karabinierëve i dëmtuar rëndë. Sipas agjencisë së lajmeve LaPresse, të paktën dy policë u lënduan, ndërsa u arrestuan rreth 50 demonstrues, shumë prej të cilëve janë të mitur.

Kryeministrja italiane Giorgia Meloni deklaroi se, megjithëse protestimi është e drejtë, "shkatërrimi i qyteteve tona nuk është". Në një postim në rrjetet sociale, ajo theksoi se huliganët kanë shfrytëzuar protestat për të shkaktuar trazira, për të sulmuar forcat e sigurisë dhe për të paralizuar jetën në qytete.

Kryebashkiaku i Milanos, Giuseppe Sala, deklaroi se "arsyet e protestës janë të kuptueshme, por dhuna ndaj policisë dhe dëmet serioze të shkaktuara në qytet nuk mund të justifikohen".

Fshat me çadra në Lisbonë
Në Lisbonë, demonstruesit ngritën një fshat me çadra – në shembullin e atij që u formua në Madrid para tri javësh – për të kërkuar zgjidhje për krizën e banimit dhe kostot e larta të jetesës. Qindra demonstrues u mblodhën në mbrëmje në sheshin "Rossio", që ndodhet në zemrën turistike të kryeqytetit portugez, pas marshit ku morën pjesë mijëra njerëz nga e gjithë vendi.

Pjesëmarrësit vendosën të kalojnë natën atje; mund të shiheshin qindra njerëz duke kënduar këngë, të mbledhur rreth monumentit të mbretit Pedro IV në qendër të sheshit. "Klasa e mesme portugeze – ata që paguajnë taksa dhe mbi të cilët mbështetet ky vend – është nën sulm dhe po humb të drejtat e saj, veçanërisht të drejtën për banim", tha Elena Costa, një punonjëse sociale 46-vjeçare. "Prandaj jemi të gjithë këtu; duam të dërgojmë një mesazh se po na mbytën."

Inxhinieri Antonio Margado (52) kritikoi qeverinë e djathtë për "liberalizimin e plotë të qirave", duke theksuar se "pronaret e pasurive marrin mbrojtje gjithnjë e më të madhe, ndërsa qiramarrësit që kanë nevojë për një shtëpi bëhen gjithnjë e më të pambrojtur". Të dhënat zyrtare tregojnë se çmimet e pronave në Portugali u rritën me 124 për qind në periudhën midis 2015 dhe 2024 – një normë që është afërsisht dyfish më e lartë se mesatarja në Bashkimin Evropian.

Kjo prek më së shumti të rinjtë dhe banorët e Lisbonës; rreth një e katërta e 11 milionë banorëve të Portugalisë jetojnë në zonën më të gjerë të Lisbonës. Protestat e së shtunës në Lisbonë janë vazhdim i aktiviteteve që filluan në Porto, ku tashmë janë ngritur dhjetëra çadra.