Drama në qiell: një avion nga Tel Avivi duhej të ulej urgjentisht në Bullgari

Një avion që u ngrit nga Tel Avivi bëri një ulje urgjente në Bullgari pasi u raportua për një bombë, u njoftua sot në faqen e internetit "FlightRadar24".

Avioni që fluturonte nga Tel Avivi për në Vjenë, u devijua dhe u ul në Sofje për shkak të asaj që Ministria bullgare e Transportit dhe Lidhjeve e përshkroi si "sinjal kërcënimi me bombë", raporton "Sky News".

Sipas informacionit nga faqja e internetit "FlightRadar24", ky avion i "Austrian Airlines" me shenjën OS82 u devijua drejt Sofjes, ku u ul të dielën në orën 20:42 me kohën mesatare evropiane qendrore.

"Mund të konfirmojmë se është dërguar një kërcënim ndaj fluturimit OS82 në linjën Tel Avivi-Vjenë, që detyroi ndalimin në Sofje (SOF)", njoftoi "Austrian Airlines".

Në avion kishte 51 pasagjerë dhe gjashtë anëtarë ekuipazhi, dhe pas përfundimit të inspektimit të avionit, pasagjerët do të devijohen në fluturimin alternativ të radhës.

Ministria bullgare më parë njoftoi se, në përputhje me procedurat, një avion luftarak i forcave ajrore bullgare u ngrit dhe ndoqi avionin derisa ai u ul në aeroportin e Sofjes, dhe konfirmoi se është formuar një grup pune dhe se hetimi është në vazhdim.