(Video) Protesta të dhunshme në Itali: policia përdori gaz lotsjellës në Milano, topa uji në Bolonjë
Policia italiane përdori gaz lotsjellës kundër demonstruesve në Milano, pasi u sulmua me gurë dhe objekte të tjera gjatë përleshjeve në sheshin para katedrales gotike të njohur në qendër të qytetit, raportuan mediat italiane.
Incidentet e dhunshme ndodhën gjatë protestave kundër kostove të larta të jetesës, kur një pjesë e demonstruesve u shkëputën nga marshimi kryesor dhe u përleshën me policinë.
Policët e pajisur për shuarjen e trazirave u përpoqën të largonin demonstruesit me fytyra të mbuluara nga galeria “Vittorio Emanuele II”, arkada luksoze tregtare pranë sheshit para katedrales.
Për shkak të trazirave, dyqanet në zonën qendrore të qytetit mbyllën dyert, ndërsa turistët filluan të largoheshin nga zona. Stacioni i metrosë “Duomo”, pranë katedrales, u mbyll gjatë përleshjeve.
Sipas mediave italiane, disa persona u lënduan në incidentet, ndërsa policia kreu edhe disa arrestime. Deri tani nuk është dhënë numri i saktë i të lënduarve dhe të arrestuarve në Milano.
Përleshje edhe në Bolonjë, shtatë të arrestuar
Dhuna ndodhi edhe në qytetin verior italian Bolonjë, ku policia përdori topa uji për të shpërndarë demonstruesit pasi protesta u kthye në përleshje.
Agjencia e lajmeve ANSA raportoi se në Bolonjë u arrestuan shtatë persona.
Incidentet në Itali ndodhin në një periudhë të protestave të shtuar në disa vende evropiane, të nxitura nga pakënaqësia për shkak të rritjes së kostove të jetesës dhe përkeqësimit të shërbimeve publike.
Në Francën fqinje, dhjetëra mijëra qytetarë dolën në rrugë të shtunën për shkak të rritjes së kostove të jetesës dhe problemeve me shërbimet publike. Demonstratat u kthyen në përleshje të dhunshme në disa qytete, që sipas raporteve përbën një nga valët më të dhunshme të protestave në vend në vitet e fundit.
