Kenia konfirmon katër raste të reja me ebola, gjithsej shtatë të infektuar

Kenia konfirmoi katër raste të reja me ebola, duke çuar numrin total të të infektuarve në vend në shtatë, njoftoi sot Ministria e Shëndetësisë. Mbrëmë autoritetet konfirmuan rastin e tretë të infeksionit.

Autoritetet keniane më 6 tetor njoftuan se një ditë më parë në një spital në Nairobi kishte ndërruar jetë një shtetas kenian, i cili jetonte në Republikën Demokratike të Kongos (RD Kongo). Ky ishte rasti i parë i konfirmuar i ebolës dhe vdekja e parë e lidhur me këtë sëmundje e regjistruar në këtë vend të Afrikës Lindore.

Epidemia në RD Kongo ka marrë mijëra jetë

Republika Demokratike e Kongos po përballet me epideminë e 17-të të ebolës në historinë e saj. Në vetëm disa muaj, ajo u shndërrua në epideminë më vdekjeprurëse të kësaj sëmundjeje të regjistruar ndonjëherë në vend.

Epidemia u shpall zyrtarisht në mes të majit. Sipas të dhënave që autoritetet shëndetësore në Kongo publikuan katër ditë më parë, janë regjistruar më shumë se 9,000 raste infektimi dhe 4,381 vdekje.

Uganda, që kufizohet me provincën Ituri në RD Kongo, një nga vatërat e epidemisë aktuale, ka konfirmuar 20 raste të ebolës, prej të cilave dy kanë përfunduar me vdekje. Organizata Botërore e Shëndetësisë (OBSH) në fund të gushtit shpalli se epidemia në Ugandë ka përfunduar.

Nuk ka vaksinë të miratuar për llojin aktual të virusit

Ebola transmetohet përmes kontaktit me lëngjet trupore të një personi të infektuar dhe shkakton ethe hemorragjike, të cilat mund të jenë vdekjeprurëse.

Për llojin Bundibugyo, që shkakton epideminë aktuale, deri tani nuk ka vaksinë të miratuar as trajtim specifik.