Hakerët sulmuan dyqanet e „Carrefour“, „Spar“ dhe „Ikea“ në Evropë; ngrohën frigoriferët deri në 50 gradë

Hakerët kryen një sulm ndaj sistemeve të ftohjes në dhjetëra supermarkete në shtatë vende evropiane. Sipas raportimit të BBC, janë prekur dyqane në Belgjikë, Luksemburg, Suedi, Irlandë, Holandë, Estoni dhe Finlandë, ku temperatura në disa frigoriferë dhe ngrirës arriti deri në 50 gradë Celsius.

Në Belgjikë dhe Luksemburg janë prekur rreth 40 supermarkete të zinxhirit „Delhaize“, ndërsa probleme janë raportuar edhe në zinxhirë të tjerë tregtarë, përfshirë „Carrefour“, „Spar“, „IKEA“, „ICA“ dhe „Coop“.

Kompania belge „Sabcobel“, e cila prodhon disa nga pajisjet e ftohjes të prekura, njoftoi se sistemet u vendosën në modalitetin e shkrirjes, gjë që çoi në rritje të menjëhershme të temperaturës. Supozohet se sulmuesit përdorën të njëjtën metodë si në tetor, kur u sulmuan qindra supermarkete në Francë. Sipas mediave lokale, në atë incident u prish ushqim me vlerë miliona euro.

Stefan Moelans, drejtor i „Sabcobel“, për agjencinë belge të lajmeve „Belga“ konfirmoi se bëhet fjalë për një sulm kibernetik. Ai deklaroi se punonjësit kaluan gjithë natën dhe mëngjesin duke shkëputur pajisjet e prekura nga rrjeti.

Ai shpjegoi se, pas sulmeve në Francë, kompania punoi për sigurimin e sistemeve të ftohjes për klientët e saj. Megjithatë, vetëm përditësimet softuerike nuk janë të mjaftueshme për zgjidhjen e plotë të problemit të sigurisë – nevojiten edhe modifikime fizike të pajisjeve.

Shumica e supermarketeve evropiane përdorin sisteme ftohjeje të lidhura me internetin, që mundësojnë mirëmbajtje dhe zgjidhje problemesh në distancë. Moelans theksoi se, pas sulmeve në Francë, shumë klientë kaluan në menaxhimin e pajisjeve të tyre të ftohjes përmes një lidhjeje të sigurtë interneti.

Ende nuk dihet se kush qëndron pas sulmeve më të fundit.