Hungaria heq pjesë të ligjeve të Orbanit kundër komunitetit LGBT

Parlamenti hungarez sot votoi për ndryshimin e ligjit për mbrojtjen e fëmijëve, duke hequr dispozitat që synonin personat LGBT, të cilat u futën në vitin 2021 gjatë mandatit të ish-kryeministrit Viktor Orban. Për ndryshimet votuan 139 deputetë, ndërsa 51 votuan "kundër".

Kjo përbën ndryshimin e parë të rëndësishëm të ligjeve të Orbanit që kufizonin të drejtat LGBT, pasi kryeministri pro-evropian Péter Márki-Zay mori detyrën në maj.

Ligji i mëparshëm ndalonte shfaqjen dhe promovimin e orientimeve seksuale dhe identiteteve gjinore të ndryshme në përmbajtjet e disponueshme për fëmijët. Sipas rregullave të reja, ndalimi do të zbatohet për përmbajtje që mund të rrezikojnë seriozisht zhvillimin fizik, intelektual, emocional ose moral të fëmijëve nën 18 vjeç.

Márki-Zay e mundi bindshëm Orbanin në zgjedhjet parlamentare në prill, duke i dhënë fund sundimit të tij 16-vjeçar. Gjatë viteve, qeveria e Orbanit ka vendosur disa nga kufizimet më të rrepta të të drejtave LGBT në Evropë.

"Fakti që po hiqen kufizimet për aksesin në përmbajtje LGBT është padyshim një hap i rëndësishëm dhe pozitiv përpara", tha për AFP Tamás Dombos nga organizata për të drejtat e njeriut "Háttér Society". Márki-Zay deklaroi se ndryshimet do të harmonizojnë ligjet hungareze me rregullat e Bashkimit Evropian, pasi u konstatua se kufizimet e Orbanit shkelin vlerat themelore të BE-së.

Edhe pse gjatë fushatës zgjedhore nuk foli konkretisht për të drejtat LGBT, Márki-Zay tregoi gatishmëri për të ndryshuar disa nga ligjet e Orbanit pasi mori detyrën. Megjithatë, para votimit të sotëm, ai nuk i paraqiti ndryshimet si rikthim të të drejtave të komunitetit LGBT, por si forcim të mbrojtjes së fëmijëve, pavarësisht nga orientimi seksual.

"Ka ende shumë për të bërë. Edhe nëse qëllimi i vetëm i qeverisë është të rikthejë gjendjen ligjore që ekzistonte para vitit 2020, ende ka shumë ligje që duhet të ndryshohen, dhe nuk dimë nëse qeveria po punon për këtë", shtoi Dombos.

Në mesin e ligjeve që ende janë në fuqi janë ato që pengojnë personat transgjinorë të marrin njohje ligjore të identitetit të tyre gjinor dhe që ndalojnë çiftet me të njëjtin gjini të adoptojnë fëmijë. Organizata "Human Rights Watch" më parë paralajmëroi se dispozitat e tjera diskriminuese në ligjet hungareze kanë mbetur të pandryshuara.

Organizata theksoi se amendamentet e reja nuk adresojnë çështjen e terminologjisë diskriminuese në Kushtetutën Hungareze ose kufizimet në Ligjin për tubimet publike, të cilat janë përdorur për të ndaluar paradat e krenarisë dhe tubimet e tjera të lidhura me komunitetin LGBT.