Kreu i „Ryanair“ për Von der Leyen: Është e padobishme, vetëm mban fjalime
Drejtori ekzekutiv i „Ryanair“, Michael O’Leary, kritikoi ashpër kryetaren e Komisionit Evropian, Ursula von der Leyen, duke e akuzuar se nuk po bën asgjë për të përmirësuar konkurrencën e ekonomisë evropiane. Ai paralajmëroi gjithashtu se biletat e avionit do të shtrenjtohen ndjeshëm gjatë 12 muajve të ardhshëm për shkak të çmimeve më të larta të karburantit dhe kostove shtesë për emetimet e dioksidit të karbonit.
„Ursula von der Leyen ka frikë të bëjë ndonjë gjë përveç të folurit. Është e padobishme. Europa ka një plan për rritjen e konkurrencës, ai është raporti i Draghi. Dy vjet më vonë, asnjë nga rekomandimet e tij nuk është zbatuar, dhe Von der Leyen fshihet dhe nuk bën asgjë përveç se mban fjalime“, deklaroi O’Leary.
Ai akuzoi institucionet evropiane se me taksat dhe rregulloret e reja po e shtrenjtojnë transportin ajror, megjithëse, sipas tij, kompanitë ajrore me kosto të ulët janë një nga shembujt më të suksesshëm të konkurrencës evropiane.
Kritikat vijnë në një periudhë kur „Ryanair“ njoftoi se këtë dimër do të ulë kapacitetin në Belgjikë për një milion vende dhe do të heqë 20 linja ajrore, për shkak të rritjes së taksës belge për udhëtimet me avion nga dy në shtatë euro për biletë.
O’Leary kritikoi edhe sistemin evropian të tregtimit me emetime, duke pretenduar se ai ngarkon fluturimet në Evropë, ndërsa shumë fluturime ndërkontinentale janë të përjashtuara nga këto kosto.
Ai paralajmëroi se shtrenjtimi i karburantit, së bashku me kostot më të larta për emetimet, do të çojë në një rritje të ndjeshme të çmimeve të biletave të avionit vitin e ardhshëm.
