Prokurorët kërkojnë vendim urgjent nga Gjykata Kushtetuese për pagat e ulura
Këshilli i prokurorëve publik, Prokuroria Publike dhe Shoqata e prokurorëve publik kërkojnë nga Gjykata Kushtetuese që urgjentisht t'i vendosë në rend dite dhe të shqyrtojë iniciativat e paraqitura për vlerësimin e kushtetutshmërisë së dispozitave të Ligjit për ndryshimin dhe plotësimin e Ligjit për pagat e prokurorëve publik, si dhe Ligjit për pagat e anëtarëve të Këshillit të prokurorëve publik të Republikës së Maqedonisë së Veriut, me të cilat për herë të tretë u ulën koeficientët për llogaritjen e pagave të prokurorëve publik.
"Me vendim të Bordit Ekzekutiv të Shoqatës së prokurorëve publik shprehet shqetësim serioz për shkak të mosveprimit të Gjykatës Kushtetuese ndaj iniciativave të paraqitura, me çka jo vetëm që vihet në pikëpyetje pavarësia e Prokurorisë Publike dhe parimet e sundimit të së drejtës, por krijohet edhe një disparitet serioz midis funksionit gjyqësor dhe atij prokurorial, që është në kundërshtim me standardet evropiane dhe ndërkombëtare", thonë prokurorët.
Shtohet se për komunitetin e prokurorëve publik nuk ka asnjë dyshim në lidhje me arsyeshmërinë e iniciativave të paraqitura, aq më tepër që vetë Gjykata Kushtetuese në vendimin e saj me të cilin ka vendosur të nisë procedurë për vlerësimin e kushtetutshmërisë dhe ligjshmërisë së këtyre zgjidhjeve ligjore ka theksuar se:
"Është e pa diskutueshme se rregullimi i pagave është çështje ligjore dhe legjislatori ka të drejtë të rregullojë nivelin e pagave të prokurorëve publik dhe anëtarëve të Këshillit të prokurorëve publik, por Gjykata shpreh dyshim se legjislatori, me uljen e koeficientëve për llogaritjen e pagave të prokurorëve publik dhe anëtarëve të Këshillit të prokurorëve publik, ka hyrë në pavarësinë dhe autonominë kushtetuese të garantuar të prokurorisë publike, dhe vë në pikëpyetje realizimin e të drejtës së të punësuarve për pagë të përshtatshme sipas nenit 32 paragrafi 3 të Kushtetutës, e cila rrjedh nga statusi i tyre dhe krijon detyrimin për shtetin që përmes rregullimit ligjor të sigurojë bazën ligjore për realizimin e saj…". Teksti i plotë i këtij vendimi të Gjykatës Kushtetuese është në dispozicion në LIDHJE.
Prokuroria konsideron se duke pasur parasysh qëndrimin e tillë të Gjykatës Kushtetuese, për prokurorët publik është e pakuptueshme çdo vonesë në vendim ose vënia në pikëpyetje e parimeve të pavarësisë dhe autonomisë në veprimtarinë e prokurorisë publike, për të cilat Gjykata Kushtetuese është shprehur dhe i ka konfirmuar si të pakontestueshme.
Shtohet se qëndrimet që sfidojnë këto parime janë një precedent i rrezikshëm, i cili jo vetëm që është në kundërshtim me standardet evropiane për sundimin e së drejtës, por edhe kërcënon të shkaktojë një largim serioz të stafit prokurorial dhe kështu të rrezikojë kryerjen normale të funksionit prokurorial.
Shtesë, theksojnë se pagat e prokurorëve publik në vendin tonë vazhdojnë të jenë krahasimisht më të ulëta se në të gjitha vendet e tjera në rajon.
"Të gjitha këto kushte, të shoqëruara edhe me mungesën kronike të shërbimit prokurorial, buxhetit dhe kushteve bazë për punë, krijojnë një situatë absolutisht të paqëndrueshme që kërcënon funksionimin e prokurorisë, dhe kështu do të ndikojë drejtpërdrejt në realizimin e të drejtave dhe mbrojtjen e qytetarëve.
Presim që kjo situatë të përmendet edhe në raportin e ardhshëm të Komisionit Evropian për vendin, si një regres i rëndësishëm dhe kërcënim shtesë për autonominë e Prokurorisë Publike. Prandaj kërkojmë nga Gjykata Kushtetuese, pas më shumë se 8 muajsh nga paraqitja, të dëgjojë argumentet e shprehura në iniciativat e dorëzuara, të cilat mbështeten edhe me analiza krahasuese nga vendet e rajonit dhe Evropa, duke korrigjuar kështu padrejtësinë që i bëhet prokurorisë publike si një nga shtyllat kyçe të shtetit të së drejtës", thonë nga Prokuroria.
