(Video) Demonstruesi ndërpreu fjalimin e Vens me kërkesën për dosjet e Epsteinit

Nënkryetari amerikan, JD Vens, u përball me një demonstrues që kërkoi publikimin e dokumenteve lidhur me të dënuarin për abuzim seksual, Jeffrey Epstein, gjatë tubimit të djeshëm parazgjedhor në Karolinën e Veriut.

Ngjarja ndodhi në qytetin Hendersonville, ku Vens mbante fjalim para zgjedhjeve kongresuale të caktuara për 3 nëntor. Një burrë që u ul menjëherë pas tij u ngrit dhe filloi të bërtasë: "Publikoni dosjet e Epsteinit!" dhe "Zoti i bekoftë fëmijët tanë!".

Siguria e largoi demonstruesin nga tubimi, ndërsa të pranishmit brohorisnin dhe skandonin "SHBA, SHBA".

Pas ndërprerjes, Vens komentoi duke sugjeruar se demonstruesi ishte emigrant ilegal.

"Zonja dhe zotërinj, duhet të korrigjoj diçka që thashë më parë. Thashë se nuk kemi pasur asnjë kalim ilegal kufiri në SHBA. Por një nuk është keq, apo jo?", tha Vens me një buzëqeshje, duke shkaktuar të qeshura tek të pranishmit.

Vens nuk ofroi asnjë provë për origjinën apo statusin imigrant të demonstruesit.

Deklarata e tij shkaktoi reagime, përfshirë edhe nga zyra e guvernatorit demokrat të Kalifornisë, Gavin Newsom.

"Është fyese të sugjerosh se vetëm emigrantët ilegalë kujdesen për drejtësinë për viktimat dhe përgjegjësinë e kryerësve. Edhe shumica e qytetarëve amerikanë kujdesen!", njoftoi zyra e Newsom.

Publikimi i dosjeve të Epsteinit ishte një nga premtimet parazgjedhore të Donald Trumpit. Departamenti Amerikan i Drejtësisë në janar 2026 publikoi pothuajse 3.5 milion faqe lidhur me rastin, por disa materiale mbetën të papublikuara ose të redaktuara.

Epstein vdiq në burg në vitin 2019, ndërsa përballej me akuza federale për shfrytëzim seksual dhe trafikim të të miturve. Vdekja e tij u shpall zyrtarisht vetëvrasje.