(Video) Policia e Parisit shpërndan me gaz lotsjellës dhe bomba shoku demonstruesit në Sheshin Republikë

Tension në rrugët e Parisit, policia ndërhyri pasi demonstruesit sulmuan me shishe dhe gurë. Protesta nuk ishte miratuar nga autoritetet përkatëse.

Policia e Parisit përdori gaz lotsjellës dhe bomba shoku për të parandaluar një protestë të re në Sheshin Republikë në Paris, ku dhjetëra njerëz u mblodhën pas thirrjeve të publikuara në rrjetet sociale, në një situatë trazirash dhe plaçkitjesh më të gjera të regjistruara në Francë.

Gjatë pasdites, në shesh dhe në zonën përreth mbizotëronte një atmosferë e tensionuar. Forcat e fuqishme policore bllokuan të gjitha hyrjet, ndërsa demonstruesit mblidheshin, tërhiqeshin dhe ktheheshin përsëri.

Në një moment, pas ndërtesës afër filloi të ngrihej tym i dendur i zi, që tregonte se zjarre kishin shpërthyer përsëri. Policia herë pas here hynte mes demonstruesve të mbledhur dhe hidhte sasi të mëdha gaz lotsjellës.

Sipas përshkrimit të ngjarjeve, policia fillimisht lejonte demonstruesit të hynin në shesh, pastaj ndërhynte për t’i shpërndarë ata.

Eskalim ndodhi pasi demonstruesit sulmuan forcat e sigurisë me shishe dhe gurë, pas së cilës policia u përgjigj me gaz lotsjellës dhe bomba shoku.

Administrata policore e Parisit njoftoi se protesta nuk ishte miratuar. Sipas tyre, efektivët policorë kryen kontrolle dhe vendosën kordone sigurie për të mundësuar ndërhyrje të shpejtë në rast nevoje.

"Pas shenjave të para të tensionit, efektivët filluan një aksion për shpërndarjen e turmës dhe arrestimin e pjesëmarrësve", thuhet në njoftimin policor.

Sheshi Republikë tradicionalisht është vendi ku mbahen tubime protestash në Paris.