SHBA-ja rifilloi bashkëpunimin e inteligjencës me Ukrainën pas një ndërprerjeje tre-ditore, Zelenski paralajmëron për rrezikun nga raketat balistike ruse

Shtetet e Bashkuara të Amerikës rifilluan shkëmbimin e informacionit të inteligjencës me Ukrainën pas një ndërprerjeje tre-ditore, konfirmoi presidenti ukrainas Volodymyr Zelenski, duke theksuar se bashkëpunimi është thelbësor për mbrojtjen e vendit nga sulmet ruse.

Ndërprerja, sipas Zelenskit, la Ukrainën pa informacione të rëndësishme për sulmet e ardhshme ruse, veçanërisht për përdorimin e raketave balistike, për të cilat Uashingtoni disponon aftësi specifike për zbulim në kohë.

"Ishte i bllokuar për një kohë të caktuar, pastaj pala amerikane e çbloi. Jemi shumë mirënjohës për këtë. Sistemi tani funksionon përsëri", deklaroi Zelenski në një intervistë të regjistruar paraprakisht për emisionin "Meet the Press" në televizionin amerikan NBC, transmetuar të dielën.

Rifillimi i bashkëpunimit vjen pas një periudhe mosmarrëveshjesh mes Uashingtonit dhe Kievit rreth sulmeve ukrainase ndaj infrastrukturës energjetike ruse, të cilat presidenti amerikan Donald Trump i lidh me rritjen e çmimeve të naftës.

Ndërprerja tre-ditore la Ukrainën pa informacione kyçe

Zelenski paralajmëroi se ndërprerja në shkëmbimin e inteligjencës pati pasoja të drejtpërdrejta në aftësinë e Ukrainës për t'u përgatitur ndaj sulmeve balistike ruse.

"Ne nuk pamë sulmet ruse me raketa balistike", tha presidenti ukrainas, duke shpjeguar se, megjithëse dhjetëra vende ndihmojnë Ukrainën, SHBA-të kanë një aftësi të veçantë për ta paralajmëruar në kohë për përdorimin e këtij lloji armësh.

"Dhjetëra vende na ndihmojnë, por vetëm Shtetet e Bashkuara kanë atë aftësi unike për të na njoftuar kur Rusia përdor raketa balistike. Gjatë atyre tre ditëve nuk morëm ato informacione", deklaroi Zelenski.

Ukraina ka arritur rezultate të rëndësishme në luftën kundër dronëve rusë, si dhe në operacionet e saj me dronë, por raketat balistike ruse mbeten një sfidë serioze për mbrojtjen e saj ajrore.

Një nga problemet kryesore është mungesa e interceptuesve për sistemin amerikan të mbrojtjes ajrore "Patriot", për të cilët, sipas informacionit në raport, rezervat janë reduktuar së fundmi.

Mosmarrëveshja rreth infrastrukturës energjetike ruse

Ndërprerja e bashkëpunimit të inteligjencës ndodhi në kushte mosmarrëveshjesh mes Uashingtonit dhe Kievit rreth sulmeve ukrainase ndaj objekteve energjetike ruse.

Presidenti amerikan Donald Trump mendon se sulmet ndaj infrastrukturës energjetike ruse kontribuojnë në rritjen e çmimeve të naftës dizel, çështje kjo politike për administratën e tij para zgjedhjeve të ardhshme për Kongresin.

Java e kaluar Trump shpalli një të ashtuquajtur "armëpushim energjetik" në Ukrainë, që surprizoi Kievin.

Pala ukrainase pretendon se në përgjigje të kërkesës amerikane, ndërpreu përkohësisht sulmet ndaj objektivave energjetike ruse. Por pasi Rusia vazhdoi bombardimet ndaj objekteve energjetike ukrainase, Kievi rifilloi sulmet e tij.

Trump kritikoi hapur vazhdimin e operacioneve ukrainase ndaj rafinerive ruse.

"Nëse më thoni që Zelenski po sulmon përsëri rafineritë, ai vetëm rrit çmimin e naftës në botë. Mendoj se kjo është turp. Ka shumë objektiva të tjera", tha Trump të enjten në një bisedë me moderatorin e "Newsmax", Rob Finnerty.

Dallimet rreth sulmeve energjetike u shndërruan kështu në një çështje më të gjerë për mbështetjen amerikane ndaj Ukrainës dhe kushtet në të cilat ajo realizohet.

Kufizime edhe për versionin ushtarak të "Starlink"

Përveç ndërprerjes së shkëmbimit të inteligjencës, Ukraina njoftoi gjithashtu se i është kufizuar qasja në versionin ushtarak të sistemit satelitor të internetit "Starlink".

Sipas palës ukrainase, kufizimi ka ulur aftësinë e forcave të saj për të interceptuar dronë dhe për të kryer sulme në territorin rus.

Megjithatë, informacionet për atë se kush saktësisht urdhëroi kufizimin janë kontradiktore, dhe nuk është sqaruar plotësisht nëse qasja në shërbimin satelitor është rikthyer plotësisht.

Këto çështje theksojnë më tej varësinë e operacioneve ushtarake ukrainase nga disa kapacitete amerikane të inteligjencës dhe teknologjisë.

Zelenski: Putini është vrasës, por Trumpin e konsideroj aleat

Në intervistë, Zelenski foli edhe për marrëdhënien me presidentin amerikan, pasi u pyet pse Trump ka fjalë më pozitive për presidentin rus Vladimir Putin sesa për të.

Presidenti ukrainas vlerësoi se arsyeja ndoshta qëndron në qasjen e tij të drejtpërdrejtë dhe mënyrën se si komunikon me udhëheqësin amerikan.

"Jam plotësisht i sinqertë me presidentin e Shteteve të Bashkuara, jam shumë i qartë dhe mbështes Amerikën sepse jemi partnerë strategjikë", tha Zelenski.

Më pas ai drejtoi fjalë të ashpra ndaj presidentit rus.

"Ai është vrasës", deklaroi Zelenski për Putinin, duke shtuar se preferon partnerë të hapur dhe të sinqertë në vend të njerëzve që, siç tha, janë vrasës edhe kur kanë buzëqeshje në fytyrë.

Zelenski paralajmëroi se një eventuale mbështetje e SHBA-së ndaj presidentit rus do të ishte një gabim historik.

Njëkohësisht, ai theksoi se Donald Trump vazhdon ta konsiderojë aleat dhe shprehu shpresën që presidenti amerikan do të rishikojë vendimet e tij.

"Dëshirojmë t'i besojmë. Shpresoj që ai të ndryshojë vendimet e tij sepse mendoj se të gjitha janë të gabuara dhe nuk do t'i ndihmojnë as neve as Shteteve të Bashkuara", tha presidenti ukrainas.