Lukashenko sulmoi Poloninë dhe vendet baltike: „Ata shpikën gjithçka për të marrë para nga BE-ja“

Presidenti bjellorus Aleksandër Lukashenko akuzoi Poloninë dhe vendet baltike për përhapjen e thashethemeve rreth planeve të supozuara të Bjellorusisë për t'i sulmuar, duke pretenduar se e bëjnë këtë për të marrë fonde shtesë financiare.

„U duhen para. As tre vendet baltike, ish-republikat e Bashkimit Sovjetik, as Polonia nuk kanë fuqi të mjaftueshme për të përmbushur kërkesat e tyre, veçanërisht ato ushtarake“, tha Lukashenko gjatë një takimi me përfaqësues të strukturave të sigurisë në Minsk, njoftoi agjencia „Belta“.

Duke folur për kontrollet e gatishmërisë luftarake të forcave të armatosura bjelloruse, Lukashenko hodhi poshtë pretendimet se ato përbëjnë përgatitje për luftë.

„Nuk kemi qëllim të sulmojmë askënd, pavarësisht faktit që „miqtë“ tanë perëndimorë kohët e fundit kanë nisur një fushatë mediatike, duke pretenduar se Rusia do të sulmojë vendet baltike, ndoshta edhe Poloninë, nga territori i Bjellorusisë dhe së bashku me Bjellorusinë“, tha ai.

Lukashenko gjithashtu hodhi poshtë akuzat se Bjellorusia është e lidhur me kalimin e supozuar të një grupi të armatosur në territorin e Letonisë.

Sipas tij, këto pretendime shërbejnë për të siguruar fonde për Letoninë nga Bashkimi Evropian.

„E dimë mirë dhe jam tashmë i informuar se e gjithë kjo është bërë që Letonia të mund të marrë para nga Bashkimi Evropian. Ne nuk kemi asnjë lidhje me thashethemet se kemi hyrë në territorin e tyre dhe kemi kapur dikë ose kemi sjellë një grup migrantësh. Kjo është budallallëk“, tha presidenti bjellorus.

Ministri i Brendshëm i Letonisë, Janis Dombrovs, më parë njoftoi se më 6 tetor një grup personash të panjohur, të maskuar dhe të armatosur kaluan kufirin letono-bjellorus.

Sipas tij, grupi dëmtuan pjesë të infrastrukturës kufitare dhe vodhën kamera të mbikëqyrjes me video, pas së cilës u kthyen në territorin e Bjellorusisë para ardhjes së patrullës kufitare letoneze.