Makron: Do të ndalojmë protestat jolegale në Francë
Presidenti francez Emmanuel Macron njoftoi ndalimin e protestave që autoritetet i konsiderojnë jolegale, pas trazirave, dhunës dhe grabitjeve të javës së kaluar nëpër Francë. Organizatorëve të tubimeve paqësore do t'u ofrohen rrugë alternative për të mbrojtur dyqanet dhe bizneset.
Macron njoftoi këtë masë pas bisedimeve me shërbimet e inteligjencës dhe përfaqësuesit qeveritarë për dhunën gjatë protestave më 17 tetor. Për trazirat ai fajësoi grupe ekstremisht të majta dhe individë që, sipas tij, shfrytëzuan demonstratat për të shkatërruar pronën dhe për të grabitur.
Për nesër ai njoftoi një mbledhje të Këshillit të Mbrojtjes, ku do të shqyrtohen masa shtesë për parandalimin e dhunës.
Të shtunën, më 24 tetor, nëpër Francë janë paralajmëruar protesta të reja kundër kostove të larta të jetesës, ku pritet të marrin pjesë studentë dhe anëtarë të lëvizjes "Jelet e verdha".
Kryeministri Sébastien Lecornu njoftoi masa të shtuar sigurie, ndërsa ministri i Brendshëm Laurent Nuñez konfirmoi ndryshime në veprimet policore ndaj grupeve të dhunshme. Parashikohet angazhimi i një numri më të madh policësh dhe xhandarmësh, si dhe anëtarëve të njësive speciale dhe ushtrisë.
Disa protesta tashmë janë ndaluar në Paris, Lion, Lille dhe Grenoble, ndërsa në disa qytete është vendosur edhe orë policore.
Protestat nisën për shkak të pakënaqësisë ndaj kostove të larta të jetesës, gjendjes në arsim dhe politikës ekonomike. Më 17 tetor ato u kthyen në përplasje të dhunshme me policinë, ku sipas të dhënave të publikuara u dëmtuan ose u grabitën rreth 3,000 dyqane dhe biznese.
Sindikatat, që kërkojnë paga më të larta, taksë më të drejtë dhe investime më të mëdha në shërbimet publike, njoftuan një mobilizim të madh të ri më 5 nëntor.
