Miliarderi Richard Branson sulmoi publikisht Trump për qëndrimin ndaj Putin: Ai i dorëzohet diktatorëve

Miliarderi britanik dhe themeluesi i "Virgin Group", Richard Branson, kritikoi ashpër presidentin amerikan Donald Trump dhe qëndrimin e tij ndaj presidentit rus Vladimir Putin.

Në një postim në "LinkedIn", ai akuzoi administratën e Trump se i dorëzohet diktatorëve, paralajmëroi për pasojat që veprimet amerikane mund të kenë mbi Ukrainën dhe i bëri thirrje udhëheqësve evropianë të marrin përgjegjësi më të madhe për sigurinë e tyre.

"Nuk kam menduar kurrë se do të duhet ta them këtë gjatë jetës sime, por tani është viti 2026 dhe, fatkeqësisht, asgjë nuk është si më parë", filloi Branson në postimin e tij.

"Administrata e Trump ka filluar t'u dorëzohet autokratëve dhe diktatorëve, duke vënë kapriçot e tyre personale përpara interesave të popullit amerikan dhe botës së lirë. Çfarë ka Putin që e bën presidentin Trump të kënaqet kaq shumë me të?", pyeti sipërmarrësi britanik.

Branson paralajmëroi veçanërisht për erozionin e besimit midis SHBA-së dhe aleatëve të saj tradicionalë.

"Si do të mund të besojnë aleatët amerikanë përsëri në këtë administratë, kur ajo tani i kthen shpinën në kohë lufte dhe vuajtjesh?" shkroi ai.

Ai u ndal edhe te mbështetja amerikane për Ukrainën, duke ngritur akuza serioze për pasojat e veprimeve të Uashingtonit.

"Ngadalësimi i 'Starlink' dhe 'Starshield', si dhe mungesa e paqartë e paralajmërimeve në kohë për lansimet raketore ruse, kanë shkaktuar tashmë vdekje të panevojshme të civilëve ukrainas. Sa më keq mund të bëhet?", pyeti ai.

Këto janë pretendime të Branson, të cilat ai nuk i mbështeti me prova konkrete në postim. "Starlink" është një rrjet satelitor interneti i kompanisë "SpaceX", ndërsa sistemi "Starshield" është zhvilluar për nevojat e institucioneve qeveritare dhe të sigurisë amerikane.

Branson mendon se udhëheqësit evropianë nuk mund të presin më që Uashingtoni të ndryshojë politikën e tij ndaj Rusisë dhe Ukrainës.

"Nëse diçka është e qartë, është se udhëheqësit evropianë duhet të kapërcejnë tronditjen fillestare nga veprimet e fundit të Trump dhe të marrin përgjegjësi. Kjo ka të bëjë po aq me lirinë e Evropës, sa edhe me sovranitetin e Ukrainës. Vlen të luftojmë për të dyja", shkroi ai.

Branson gjithashtu bëri thirrje për masa më konkrete me të cilat vendet evropiane do t'i ndihmonin Ukrainës të mbrohej nga agresioni rus.

"Të gjitha opsionet tani duhet të jenë në tryezë – nga transferimi i fondeve të ngrira ruse te Ukraina, deri te dorëzimi i sistemeve të avancuara të armatimit, si raketat gjermane 'Taurus'", tha ai.

Në fund të postimit të tij, miliarderi britanik shprehu shqetësim për drejtimin në të cilin po shkojnë marrëdhëniet ndërkombëtare, si dhe për të ardhmen e demokracive perëndimore.

"Pse, o pse po ndodh kjo? Nuk duhet të lejojmë që bota e lirë të rrënohet para syve tanë", përfundoi Branson.