Përmbysje e madhe në qëndrimin e SHBA ndaj Rusisë; Trump: Bisedova me Putin, arritëm marrëveshje
Presidenti amerikan Donald Trump njoftoi se ka arritur një marrëveshje me presidentin rus Vladimir Putin për furnizimin me sasi të mëdha të naftës dizel ruse me qëllim uljen e çmimeve të karburantit në SHBA. Kjo përbën një përmbysje të rëndësishme në politikën amerikane ndaj Rusisë, kundër së cilës Uashingtoni ka vendosur sanksione të gjera për shkak të pushtimit të Ukrainës, shkruan "Associated Press".
Trump në rrjetet sociale njoftoi se ka biseduar me telefon me Putin dhe se janë marrë vesh për furnizimin me disa miliona tonë naftë dizel në tregun amerikan dhe atë botëror. Sipas njoftimit të Trump, Rusia duhet të dorëzojë menjëherë më shumë se 300,000 tonë dizel.
Trump: Arrita marrëveshje me Putin që Rusia të na furnizojë menjëherë mbi 300,000 tonë dizel, dhe më pas do të vijojnë miliona tonë të tjera.
"Sapo përfundova një bisedë shumë të suksesshme me presidentin rus Vladimir Putin, ku u dakorduam që Rusia të dorëzojë menjëherë më shumë se 300,000 tonë naftë dizel në tregjet e SHBA dhe botës, 500,000 tonë shtesë gjatë nëntorit dhe një milion tonë të tjerë menjëherë pas kësaj."
Ai gjithashtu njoftoi furnizim shtesë prej tre milionë tonësh në afat të shkurtër, në varësi të statusit dhe kapaciteteve të rafinerive ruse. Në total, kjo arrin mbi 4.8 milionë tonë naftë dizel.
Trump pretendon se marrëveshja do të ndihmojë në uljen e shpejtë të çmimeve të karburantit në SHBA dhe në pjesën tjetër të botës.
"Ulja e çmimeve për amerikanët – veçanërisht për fermerët tanë të shkëlqyer, blegtorët dhe shoferët e kamionëve – është prioriteti im më i lartë", deklaroi ai.
