SHBA dhe Greqia arritën marrëveshje për shitjen e pajisjeve ushtarake me vlerë katër miliardë dollarë

Shtetet e Bashkuara të Amerikës dhe Greqia arritën marrëveshje për shitjen e pajisjeve ushtarake me vlerë katër miliardë dollarë, me qëllim forcimin e kapaciteteve mbrojtëse të Athinës dhe thellimin e bashkëpunimit dypalësh.

Marrëveshja u njoftua pas dialogut të gjashtë strategjik amerikan-grek, i mbajtur në Athinë, ku morën pjesë sekretari amerikan i shtetit Marko Rubio dhe ministri grek i punëve të jashtme Jorgos Gerapetritis, transmeton Anadolu.

Sipas deklaratës së përbashkët të publikuar nga Departamenti Amerikan i Shtetit, pajisjet ushtarake do të mbështesin planet afatgjata mbrojtëse të Greqisë dhe do të përmirësojnë koordinimin operativ midis forcave të armatosura të dy vendeve. U konfirmua gjithashtu marrëveshja për përfshirjen e Greqisë në programin e partneritetit me Gardën Kombëtare të Floridës, si dhe dorëzimi i automjeteve të blinduara "Stryker".

Uashingtoni dhe Athina ranë dakord të zgjerojnë bashkëpunimin në luftën kundër terrorizmit, migracionit të paligjshëm dhe krimit të organizuar, si dhe në fushën e sigurisë kibernetike dhe teknologjive të avancuara.

Të dy vendet njoftuan gjithashtu forcimin e bashkëpunimit ekonomik dhe energjetik, me theks të veçantë në projektin e Korridorit Vertikal të Gazit dhe kërkimin e hidrokarbureve.