Ministri bullgar i Mbrojtjes: Sofja forcon mbikëqyrjen e Detit të Zi pas sulmit ndaj dy anijeve tregtare

Ministri bullgar i Mbrojtjes Dimitër Stojanov deklaroi sot se Bullgaria do të vendosë edhe dy sisteme pa pilot dhe do të rrisë mbikëqyrjen e Detit të Zi pas sulmeve ndaj dy anijeve tregtare, duke afruar konfliktin në Ukrainë pranë ujërave të saj territoriale.

Ai tha se gjatë natës u sulmua anija "HS Dignity", që lundronte nën flamurin e Guineas-Bisao, dhe pas sulmit me një pajisje pa pilot dhe shpërthimit të zjarrit, ajo u fundos pranë Krapecit, në verilindje të Bullgarisë, raporton "Novinite", transmeton "Novosti".

Nga 16 anëtarët e ekuipazhit, gjashtë u shpëtuan, ndërsa kërkimi për të tjerët vazhdon.

Stojanov tha se ende nuk është përcaktuar se çfarë lloj dronësh janë përdorur ose kush është përgjegjës për sulmet, por deklaroi se pritet të jenë përdorur dronë rusë.

Marina bullgare dërgoi menjëherë një fregatë në zonën e incidentit, ndërsa dy helikopterë ushtarakë u nisën drejt vendit ku u fundos anija "HS Dignity".

Bullgaria ka informuar aleatët e saj të NATO-s për incidentet, dhe Stojanov tha se është rënë dakord me ministrat e mbrojtjes të Rumanisë dhe Turqisë për të përmirësuar koordinimin dhe për të përshpejtuar shkëmbimin e informacionit.

Ai shtoi se Bullgaria po forcon mbikëqyrjen ajrore dhe mbrojtjen bregdetare.

Duke folur për thirrjet për aktivizimin e Nenit 4 të Traktatit të Atlantikut të Veriut, Stojanov tha se kjo nuk duhet bërë automatikisht pas çdo incidenti, por çdo rast duhet të vlerësohet individualisht.
Sipas tij, më shumë se 600 incidente të lidhura me anijet janë regjistruar në Detin e Zi që nga fillimi i luftës në Ukrainë.