Ngjitja dhe rënia e Aleksandar Vuçiçit
Aleksandar Vuçiç, njeriu që për më shumë se një dekadë ishte një nga figurat më të fuqishme në Serbi, sot, më 25 tetor, pësoi një humbje zgjedhore.
Lista Studentore, e cila u imponua si sfiduesi kryesor i pushtetit pas pothuajse dy vjet protestash, sipas vlerësimeve të vetë Vuçiçit, fitoi më shumë mandate se blloku i tij politik.
Vuçiç ndërtoi karrierën nga radhët nacionaliste të Partisë Radikale Serbe deri në majën e pushtetit shtetëror. Por, akuzat për korrupsion, presionet mbi mediat dhe pakënaqësia masive tronditën dominimin e tij shumëvjeçar.
Rruga politike e Vuçiçit
– Viti 1970 – Lindi më 5 mars në Beograd. Diplomoi në Fakultetin e Drejtësisë në Beograd në vitin 1994.
– Viti 1993 – Hyn në politikë: Bëhet anëtar i Partisë Radikale Serbe të Vojsllav Sheshellit dhe deputet në Kuvendin serb.
– 1994–2008 – Sekretar i Përgjithshëm i PRS-së: Avancohet në parti dhe bëhet një nga funksionarët e shquar të saj.
– 1998–2000 – Ministër i Informacionit: Shërben në këtë funksion në qeverinë e Mirko Marjanoviçit, gjatë sundimit të Slobodan Millosheviçit.
– 2008 – Themeloi SNS-në: Pas ndarjes me radikalët, së bashku me Tomislav Nikoliçin formoi Partinë Progresive Serbe.
– 2012 – Zv/kryeministër dhe ministër i Mbrojtjes: SNS vjen në pushtet, dhe Vuçiç bëhet një nga figurat kyçe në qeveri.
– 2014–2017 – Kryeministër i Serbisë: Pas fitores zgjedhore të SNS-së, merr detyrën e kryeministrit, dhe në vitin 2016 merr një mandat të ri.
– 2017 – President i Serbisë: Fiton zgjedhjet presidenciale dhe merr detyrën më 31 maj.
– 2022 – Mandat i dytë presidencial: Fiton përsëri në zgjedhjet presidenciale.
– 2023 – Largimi nga posti kryesor në SNS: Pas 15 vjetësh në krye të partisë, vendin e tij e merr Miloš Vuçeviç, por Vuçiç mbetet figura kryesore politike në bllokun qeverisës.
– Shtator 2026 – Dorëheqja: Largohen nga posti i presidentit me qëllim rikthimin në pozicionin e kryeministrit.
– 25 tetor 2026 – Humbje zgjedhore: Vuçiç pranon se blloku i tij politik ka humbur në zgjedhje, dhe Lista Studentore imponon veten si fituese.
Studentët i vunë fund dominimit politik
Protestat masive studentore filluan pas tragjedisë në stacionin hekurudhor në Novi Sad në nëntor 2024, ku humbën jetën 16 persona. Kërkesat për përgjegjësi dhe luftë kundër korrupsionit u shndërruan në një lëvizje më të gjerë kundër pushtetit.
Vuçiç për vite me radhë balancoi Serbinë mes Bashkimit Evropian, Rusisë dhe Kinës, ndërsa kritikët e akuzonin për përqendrim të pushtetit dhe kufizim të lirisë së mediave.
Humbja zgjedhore është një goditje serioze për politikanin që ka shënuar politikën serbe që nga viti 2012.
