Ngushtica e Hormuzit është e mbyllur, thotë Garda Revolucionare Iraniane

Marina e Korpusit të Gardës së Revolucionit Islamik (IRGC) sot përsëri njoftoi se Ngushtica e Hormuzit është e mbyllur dhe se anijeve të huaja u është ndaluar kalimi nëpër këtë korridor strategjik detar.

"Ngushtica e Hormuzit është e mbyllur dhe kalimi i anijeve të huaja nëpër të është i ndaluar", thuhet në njoftimin e Gardës Revolucionare Iraniane.

IRGC paralajmëroi se nuk mund të garantojë sigurinë e lundrimit të anijeve që nuk respektojnë rregullat iraniane në ngushticë, transmetoi agjencia iraniane e lajmeve IRNA.

Më parë sot, Garda Revolucionare Iraniane njoftoi se një zjarr i madh ka përfshirë supertankerin që transportonte më shumë se dy milion fuçi naftë të papërpunuar. Sipas pretendimeve iraniane, tankeri ka goditur një minë detare ndërsa përpiqej të kalonte nëpër Ngushticën e Hormuzit në një, siç thotë IRGC, "rrugë të paautorizuar".

Ndërkohë, "Al Jazeera" raportoi se që nga dje janë goditur të paktën dy tankerë të tjerë pranë bregut të Arabisë Saudite.

Ngushtica e Hormuzit është një nga rrugët më të rëndësishme detare në botë për transportin e naftës. Çdo kufizim i lundrimit ose incident në këtë zonë mund të ketë pasoja serioze për sigurinë e trafikut detar dhe furnizimin global me energji.