Rumania mori qeveri të re: Parlamenti votoi kabinetin e Nikulesku
Rumania sot mori një qeveri të re pasi parlamenti i vendit votoi për kabinetin e propozuar nga kryeministri Luka Nikulesku, u njoftua pas seancës së përbashkët të Dhomës së Përfaqësuesve dhe Senatit. 280 deputetë votuan për zgjedhjen e qeverisë së Luka Nikuleskut. Nikulesku, pasi parlamenti mbështeti qeverinë e tij, tha se Rumania po del nga një krizë politike gjashtëmujore dhe se qeveria e re do të fillojë menjëherë punën, raporton „Digi24“.
Ai njoftoi se seanca e parë e qeverisë së re do të mbahet që mbrëmë.
Kabineti i tij mori shumë më tepër se 233 votat e nevojshme për zgjedhjen e qeverisë.
„E kam pranuar këtë votim me emocione dhe përgjegjësi. Falënderoj parlamentin për besimin, si dhe Partinë Socialdemokrate (PSD), Partinë Liberale Kombëtare (PNL), Bashkimin Demokratik të Hungarezëve në Rumani (UDMR), përfaqësuesit e pakicave kombëtare dhe deputetët që votuan për këtë qeveri“, tha Nikulesku në deklaratën e tij të parë pas votimit.
Ai vlerësoi se votimi është një moment i rëndësishëm për Rumaninë, duke theksuar se vendi „po del nga një krizë gjashtëmujore“ dhe se qeveria duhet të fillojë punën menjëherë.
„Prioritetet janë të njohura. Rumania nuk mund të presë më“, tha kryeministri.
Nikulesku përmendi pasojat e ngërçit politik disa mujor, duke thënë se qytetarët ndiejnë pasojat e tij përmes ligjeve, rritjes së papunësisë, gjendjes ekonomike dhe trendeve gjeopolitike.
„Rumania tani ka një qeveri me kompetenca të plota. Fillojmë menjëherë punën, edhe pse vijnë nga mjedise të ndryshme dhe me përvoja të ndryshme. Disa janë politikanë me përvojë shumëvjeçare, ndërsa të tjerët janë të pavarur dhe vijnë nga bota akademike dhe artistike. Do të formojmë një ekip dhe do të punojmë së bashku“, tha kryeministri rumun.
