(Video) Një 13-vjeçar plagos me thikë një mësuese dhe një nxënës në një shkollë në Rumani

Një nxënës 13-vjeçar ka sulmuar dhe plagosur me thikë një mësuese dhe një nxënës tjetër në një shkollë në qytetin rumun Bistrița, njoftoi sot policia. Mediat rumune raportuan se djaloshi kishte postuar mesazhe në rrjetet sociale menjëherë para sulmit, ku paralajmëronte planin e tij, transmeton "Reuters".

"Policia rreth orës 8:40 mori një njoftim se një nxënës i klasës së shtatë në një shkollë në Bistrița kishte sulmuar me thikë një mësuese dhe një nxënës tjetër", thuhet në njoftimin e policisë.

Një burim nga drejtësia rumune për "Reuters" deklaroi se 13-vjeçari është nën hetim për dyshim për tentativë vrasjeje të rëndë. Megjithatë, për shkak të moshës, nuk do të ndiqet procedurë gjyqësore kundër tij. Reuters nuk arriti të kontaktojë me avokatin e djaloshit.

Sipas të njëjtit burim, djali kishte postuar në TikTok mesazhe që nxisnin dhunë. Megjithatë, prokurorët duhet të shqyrtojnë pajisjet e tij elektronike para se të nxjerrin përfundime përfundimtare.

Disa media rumune raportuan se nxënësi kishte paralajmëruar qëllimet e tij në internet menjëherë para sulmit. Në një nga fotografitë e publikuara në mediat lokale shihet një djalë që fotografohet para pasqyrës në banjë, duke mbajtur një thikë dhe duke veshur një helmetë me kamerë.

TikTok ende nuk ka komentuar rastin. Ministri rumun i Arsimit, Mihai Dimian, tha se hetuesit duhet të përcaktojnë nëse postimet që i atribuohen djaloshit janë autentike.

"Raportimet mediatike sipas të cilave nxënësi paralajmëroi sulmin në TikTok duhet të sqarohen nga hetuesit", shkroi Dimian në Facebook.

Sulmi në Rumani vjen pas një serie incidentesh të dhunshme në shkollat evropiane këtë vit, duke përfshirë sulmet në Poloni, Francë dhe Suedi. Autoritetet në disa raste kanë paralajmëruar për ndikimin e rrjeteve sociale dhe komuniteteve në internet që glorifikojnë dhunën.