Të shtëna pranë një spitali në Çikago, katër të plagosur

Katër persona u plagosën në të shtëna që ndodhën dje herët në mëngjes pranë spitalit "Loreto" në Çikago, dhe një nga të plagosurit është në gjendje kritike, raporton ABC.

Sipas policisë, një burrë 45-vjeçar po qëndronte në trotuar kur një automjet terreni ndaloi pranë tij, nga i cili një person i panjohur qëlloi me armë disa plumba drejt tij. Burri u dërgua në spitalin "Mount Sinai", ku ndodhet në gjendje kritike.

Në të shtënat u plagosën edhe një grua 39-vjeçare, e goditur në gjoks, një burrë 30-vjeçar me plagë nga plumbat në qafë dhe shpatull, dhe një burrë 28-vjeçar me dy plagë nga plumbat në fytyrë. Të tre janë jashtë rrezikut për jetën.

Policia deri tani nuk ka dhënë detaje për rrethanat e sulmit, ndërsa hetimet janë në vazhdim.