Tankeri goditur me dy raketa pranë EBA-së, anëtar i ekuipazhit i plagosur

Agjencia për operacione tregtare detare e Mbretërisë së Bashkuar (UKMTO) njoftoi sot se ka marrë një raport për një incident në veri-lindje të Hor Fakhan, në ujërat territoriale të Emirateve të Bashkuara Arabe, ku një tanker që po lundronte drejt jugut raportoi se ishte goditur me dy raketa.

Një anëtar i ekuipazhit u plagos lehtë, ndërsa anija pësoi dëme materiale. Pavarësisht incidentit, tankeri vazhdoi të lundrojë në rrugën e tij, thuhet në njoftimin e UKMTO-së, transmeton Reuters.

Sipas agjencisë, bëhet fjalë për një tanker për transportin e gazit natyror të lëngshëm (LNG), i cili u sulmua nga persona në një varkë të vogël, e njohur si skif, pranë qytetit jemenas Al Mukala.

Sipas informacioneve të transmetuara nga Al Jazeera, në varkën e vogël kishte të paktën shtatë burra.

"Nga varka u qëlluan dy plumba drejt tankerit, pas së cilës ekipi i armatosur i sigurisë së anijes qëlloi dy plumba paralajmërues drejt mjetit të vogël lundrues, duke detyruar ekuipazhin e tij të ndryshojë kursin", thuhet në njoftimin e UKMTO-së.

Agjencia paralajmëroi se këto incidente tregojnë për tensione të shtuar dhe rreziqe sigurie në rrugët kryesore detare të Lindjes së Mesme.