Tankeri në ujërat territoriale rumune goditur nga një dron?
Tankeri „Yara J“, i cili lundron nën flamurin e Komoreve, mbrëmë dyshohet se është goditur nga një dron në ujërat territoriale rumune në Detin e Zi, afër portit Sulina, në deltën e Danubit. Pas incidentit, në anije shpërtheu një zjarr, gjë që detyroi autoritetet rumune të fillojnë një operacion shpëtimi, raportoi televizioni rumun „Antena 3 CNN“.
Sipas informacioneve fillestare, tankeri ndodhej në një distancë prej tetë deri në dhjetë milje detare juglindje të Sulinës. Ekipazhi raportoi incidentin te autoritetet portuale; sipas mediave rumune, ekuipazhi përbëhet nga shtetas sirianë.
Roja bregdetare rumune: Zjarri është shuar
Në orën 20:25 me kohën lokale, Qendra Rumune për Koordinimin e Shpëtimit Detar (MRCC) kërkoi ndërhyrje nga agjencia përgjegjëse për kërkim dhe shpëtim detar. Gjashtë minuta më vonë, anija shpëtimtare „SAR Apollo“ u dërgua drejt tankerit.
Roja bregdetare rumune më vonë konfirmoi se anija ishte ankoruar në ujërat territoriale rumune dhe kishte raportuar zjarr. Sipas njoftimit të tyre, ekuipazhi më pas njoftoi se zjarri ishte shuar, të gjithë në anije janë të sigurt dhe nuk kanë më nevojë për ndihmë.
Ende nuk dihet kush është përgjegjës.
Tankeri „Yara J“, i regjistruar me numrin IMO 9221803, është i destinuar për transportin e naftës dhe produkteve kimike. Sipas mediave rumune, ai kishte mbërritur nga porti turk i Yalovës dhe duhej të vazhdonte udhëtimin drejt Danubit.
Mediat e shumta rumune raportuan për një sulm me dron, duke u thirrur në informacionet fillestare nga vetë anija. Megjithatë, roja bregdetare rumune deri tani ka konfirmuar vetëm zjarrin, por jo shkakun e tij. Nuk dihet se kush mund të ketë nisur dronin.
Nëse konfirmohet, sulmi do të ishte me rëndësi të veçantë, pasi ndodhi në ujërat territoriale të Rumanisë – një vend anëtar i NATO-s dhe Bashkimit Evropian.
