Irani mori ministër të ri të mbrojtjes: Parlamenti zgjodhi Mehrdad Ahlaki Ketabchi
Deputetët në parlamentin iranian sot me shumicë votash zgjodhën Mehrdad Ahlaki Ketabchi si ministër të ri të mbrojtjes, raportojnë mediat iraniane.
Ketabchi mori 237 vota "për", 15 "kundër", ndërsa nuk pati asnjë abstenim. Në seancë morën pjesë gjithsej 277 deputetë, njoftoi agjencia iraniane e lajmeve Tasnim.
Ai është ministri i 15-të i mbrojtjes dhe mbështetjes së forcave të armatosura të Republikës Islamike të Iranit. Në këtë detyrë ai pason Shahid Nasirzadeh, i cili u vra në sulmet amerikano-izraelite në shkurt të këtij viti.
Para votimit, Ketabchi iu përgjigj pyetjeve të deputetëve lidhur me planet dhe kualifikimet e tij. Seancën e drejtoi kryetari i parlamentit, Mohammad Bagher Qalibaf.
Presidenti iranian Masud Pezeshkian gjithashtu mbrojti planet e ministrit të propozuar.
Ketabchi u propozua për këtë funksion më 4 tetor, kur Pezeshkian dërgoi një letër në parlament me të cilën e nominoi për ministër të ri të mbrojtjes.
Gjatë javës së kaluar, ai në dy takime me deputetët shpjegoi planet e tij dhe dëgjoi mendimet e tyre. Kohët e fundit u takua edhe me komandantët e ushtrisë iraniane dhe Korpusit të Gardës Revolucionare Islamike (IRGC), ku dëgjoi vërejtjet dhe shqetësimet e tyre.
Anëtarët e Komitetit Parlamentar për Sigurinë Kombëtare miratuan planet që propozoi Ketabchi, njoftoi agjencia iraniane e lajmeve.
