SHBA i ndalon agjencive qeveritare përdorimin e inteligjencës artificiale kineze
Qeveria e SHBA-së të hënën urdhëroi agjencitë e saj të ndalojnë përdorimin e mjeteve të inteligjencës artificiale të zhvilluara nga startup-i kinez „DeepSeek“. Vendimi është marrë në një kohë të konkurrencës gjithnjë e më intensive për dominim në sektorin teknologjik që po rritet shpejt, shkruan „France24“.
Rrezik për sigurinë kombëtare
Departamenti i Sigurisë së Brendshme (DHS) ka lëshuar një direktivë që ndalon produktet e „DeepSeek“, si dhe mjetet e palëve të treta që bazohen në teknologjinë e tyre. Në direktivë thuhet se këto mjete duhet të hiqen nga të gjitha pajisjet IT në agjencitë qeveritare.
Jurisdiksioni i këtij departamenti përfshin agjencitë civile, por jo ushtrinë apo shërbimet e inteligjencës. Departamenti i Mbrojtjes së SHBA-së nuk iu përgjigj kërkesës së AFP për koment.
Në dokumentin që shoqëron direktivën thuhet se „modelet e ’DeepSeek‘ përbëjnë shumëfish vektorë kërcënimesh“. Departamenti paralajmëron se përdorimi i mjeteve të tyre të inteligjencës artificiale „mund të çojë në transferimin e të dhënave të ndjeshme në Kinë, nëse përdoren nga punonjës të qeverisë amerikane ose furnizuesit e saj“.
Arsyeja e shqetësimit qëndron në faktin se serverët e kompanisë ndodhen në Kinë, ku sistemi ligjor i jep qeverisë lokale „fuqi të gjera“ për akses në infrastrukturën e kompanive private. „DeepSeek“ nuk iu përgjigj kërkesës për koment.
Sfida kineze për dominimin amerikan
„DeepSeek“ është një nga laboratorët kryesorë kinezë të inteligjencës artificiale. Në janar 2025, kompania prezantoi një chat-bot me performancë të lartë dhe çmim të ulët, duke vënë në dyshim perceptimin deri atëherë për dominimin amerikan në këtë sektor.
Në prill, kompania lançoi modelin e ri, shumëpritur V4, dhe këtë muaj publikoi edhe një version më të shpejtë dhe më të lehtë të tij. SHBA akuzojnë „DeepSeek“ dhe kompanitë e tjera kryesore kineze të inteligjencës artificiale për vjedhje sistematike të funksionaliteteve nga modelet më të avancuara të zhvilluara nga konkurrentët amerikanë.
Pavarësisht konkurrencës së ashpër, Kina dhe SHBA në shtator ranë dakord të krijojnë një „kanal komunikimi“ për incidente të lidhura me inteligjencën artificiale. Pritet që kjo temë të diskutohet përsëri muajin e ardhshëm, kur udhëheqësit e dy vendeve do të takohen në një samit në qytetin kinez Shenzhen.
