(Video) Dronët ukrainas goditën një fabrikë petrokimike në Omsk, shpërtheu një zjarr i madh
Dronët ukrainas të shtunën sulmuan një fabrikë petrokimike në qytetin rus Omsk, duke shkaktuar një zjarr të madh në kompleksin industrial, njoftoi "Ukrainska Pravda". Objektet ndodhen rreth 2,500 kilometra larg kufirit ukrainas.
Një video nga sulmi u publikua nga komuniteti ukrainas OSINT "Exilenova Plus", dhe incidentin e konfirmoi edhe guvernatori i rajonit të Omskut, Vitalij Khotsenko.
Sipas informacionit fillestar nga analistët ushtarakë, u goditën pjesë pranë dy linjave prodhuese në fabrikën "Omski Kauchuk". Raportohet se goditjet ishin pranë linjave D-3, ku prodhohet metil-terc-butil eter (MTBE), dhe D-5.
Fabrika është një nga prodhuesit rusë të gomës sintetike dhe kimikateve industriale, përfshirë fenol, aceton dhe alkool izopropilik. Gjithashtu prodhon MTBE, një përbërës që përdoret si komponent në prodhimin e benzinës me oktan të lartë. Sipas informacioneve të publikuara, kapaciteti i objektit është rreth 500,000 tonë produkte petrokimike në vit.
Derimë tani nuk ka informacione të plota për shkallën e dëmeve dhe për ndonjë të lënduar në sulm.
U sulmuan edhe objekte të tjera industriale ruse
Të shtunën në mëngjes u godit edhe fabrika "Tolyattikauchuk" në qytetin Tolyatti, në rajonin Samara. Edhe atje pas sulmit u vunë re shpërthime dhe zjarre, njoftoi "Ukrainska Pravda".
Dita më parë, më 23 tetor, u sulmua ndërtesa kryesore prodhuese e fabrikës "Proton-Elektroteks" në qytetin rus Orel. Objekti ka një cikël të plotë prodhimi dhe prodhon pajisje dhe aparate optoelektronike.
