(Video) Eskaluan tensionet mes Sirisë dhe Jordanisë, civilë u vranë në sulme ajrore

Siria ka mbyllur pikën kufitare Nasib me Jordaninë, duke ndaluar trafikun e pasagjerëve dhe mallrave në të dy drejtimet, njoftoi Drejtoria e Përgjithshme e Portave dhe Doganave.

Autoritetet si arsye përmendën "kushtet aktuale dhe zhvillimin e situatës në terren" në provincën Dara, duke theksuar se qëllimi i vendimit është mbrojtja e udhëtarëve dhe personelit në pikën kufitare.

Autoritetet njoftuan se po ndjekin zhvillimet dhe po marrin masa për sigurimin e sigurisë publike.

Mbyllja e kufirit vjen pas sulmeve ajrore jordaneze mbi jugun e Sirisë, në të cilat kanë vdekur gjashtë persona, përfshirë një burrë të moshuar dhe tre fëmijë, ndërsa katër persona janë plagosur, sipas të dhënave të Drejtorisë së Shëndetësisë në Dara.

Ministria siriane e Punëve të Jashtme njoftoi se ka dërguar një protestë ndaj Jordanisë për shkak të sulmeve, të cilat i cilësoi si të kryera pa koordinim paraprak. Ministria shprehu keqardhje të thellë për viktimat dhe njoftoi se kontaktet me Jordaninë vazhdojnë.

Më parë, ushtria jordaneze njoftoi se objektivat e sulmeve ishin vende që i përkisnin "organizata terroriste", të cilat i lidh me të shtënat në kishën "Hamud" në provincën jugore jordaneze Karak.

Në atë sulm u vranë nëntë persona që ishin pjesëmarrës në një kortezh funeral.