Objekte të regjistruara me vlerë prej një denari dhe inventarë të paplotë në Ministrinë për Transformim Digjital, nga aty pretendojnë se problemet janë trashëguar

Shumica e problemeve që konstatoi Zyra Shtetërore e Auditimit në Ministrinë për Transformim Digjital janë trashëguar nga Ministria e mëparshme për Shoqëri Informative dhe Administratë, dhe disa prej tyre janë më të vjetra se një dekadë, njoftuan nga kabineti i ministrit Stefan Andonovski. Nga aty theksojnë se disa nga vërejtjet tashmë janë tejkaluar, ndërsa për të tjerat po ndërmerren masa korrigjuese.

Reagimi vjen pas publikimit të raportit përfundimtar të auditimit, në të cilin u konstatua inventar i paplotë, pasuri të paluajtshme me vlerë kontabël mbi 140 milion denarë pa dokumentacion për identifikimin e objekteve, pagesa për blerje pa procedurë të zbatuar për prokurim publik dhe mungesë e auditimit të brendshëm funksional. Për raportet financiare të buxhetit bazë auditorët u abstenuan nga dhënia e mendimit për shkak të mungesës së provave të mjaftueshme dhe të përshtatshme të auditimit, ndërsa për përputhshmërinë me rregulloret ligjore dhanë mendim me rezervë.

Ministria thekson se me formimin e institucionit të ri në vitin 2024 trashëguan evidenca të paplota, çështje të pazgjidhura pronësore-ligjore, procedura gjyqësore dhe mangësi administrative.

"Është veçanërisht e rëndësishme të theksohet se inventar i plotë dhe thelbësor i pasurisë nuk është kryer në dhjetë vitet e fundit, gjë që ka çuar në mospërputhje serioze midis gjendjes faktike, evidencës kontabël dhe dokumentacionit në dispozicion", thuhet në reagim.

Në lidhje me 13 objektet e regjistruara me vlerë prej një denari, Ministria shpjegon se bëhet fjalë për evidencë të trashëguar dhe të çrregullt, dhe jo për vlerën e tyre reale tregtare.

Nga aty pretendojnë se tashmë po ndërmerren aktivitete për pastrimin e gjendjes pronësore, përputhjen e evidencave dhe sigurimin e dokumentacionit të nevojshëm.

Në lidhje me vërejtjet për prokurimet publike, evidencën financiare dhe kontrollet e brendshme, Ministria thekson se tashmë ka dërguar përgjigje te Zyra Shtetërore e Auditimit, ku ka theksuar se bëhet fjalë për pagesa për blerje të institucioneve të tjera, ku Ministria është përdorues, përfshirë pastrim dhe sigurim objektesh, udhëtime zyrtare dhe telefoninë.

Në raportin e auditimit gjithashtu thuhet se në vitin 2024 janë paguar 2.73 milion denarë për mallra dhe shërbime pa procedurë të zbatuar për prokurim publik, çka auditorët e vlerësuan si mospërputhje me Ligjin për prokurimet publike.

Ministria u ndal edhe te procedurat gjyqësore të trashëguara, duke theksuar se ato rrjedhin nga vendime dhe detyrime të krijuara në vitet e mëparshme dhe se po shqyrtohen individualisht, në bashkëpunim me institucionet kompetente, me qëllim zgjidhjen ligjore dhe minimizimin e pasojave financiare mbi buxhetin shtetëror.

Si sfidë shtesë përmend mungesën e stafit profesional, veçanërisht për shkak të diferencës në pagat midis sektorit shtetëror dhe atij privat të IT-së. Forcimi i kapaciteteve administrative dhe profesionale, siç theksojnë, mbetet një nga prioritetet e institucionit.

"Qasja jonë nuk është të fshehim problemet apo t’i lëmë ato për ndonjë drejtim tjetër. Përkundrazi, jemi të vendosur t’i pastrojmë trashëgimitë institucionale, pavarësisht sa gjatë janë neglizhuar këto çështje", thuhet në njoftim.

Ministria shton se mbeten të hapur për bashkëpunim me Zyrën Shtetërore të Auditimit dhe për zbatimin e rekomandimeve të saj, me qëllim krijimin e evidencës së rregullt, veprimtari ligjore dhe menaxhim të përgjegjshëm të fondeve publike.